Փաստ ինֆո

Մենք ուշադրության կենտրոնում ենք պահում բոլոր կոնտակտավորներին, որովհետև ըստ էության, բոլորս կոնտակտավոր ենք, այդ թվում նաև դուք։ Այս մասին լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը՝ պատասխանելով հարցին, թե ինչու պատգամավորները չեն ինքնամեկուսանում՝ դրանով խախտելով հակահամաճարակային կանոնները, քանի որ իրենք կոնտակտավոր են։

Նրա խոսքով՝ պետք է լինել ուշադիր և զգոն, իսկ ինչ վերաբերում է ինքնամեկուսանալուն, ապա ըստ բժիշկների ցուցումի, նրանց հետ խորհրդակցելով ձեռնարկվում են միջոցառումներ։

Նրա խոսքով՝ այն պատգամավորները, որոնք առավել շատ շփումների մեջ են, այդ թվում և Լիլիթ Մակունցը, ձեռնարկում են բոլոր քայլերը, որոնք բժիշկներն ասում են։

«Բոլոր նրանք, որոնք վարակակիր են, մեկուսացած են: Բոլոր նրանք, որոնք կոնտակտավոր են եւ հնարավոր է, որ ունենան ախտանշաններ, հանձնում են թեստեր եւ եթե դրական կլինի, բնականաբար, չեն գա: Ով ներկայացել է, ուրեմն ախտանշան չունի, կամ եթե ունեցել է, թեստ է հանձնել եւ բացասական է եղել»,- ասաց Մակունցը։

Դիտարկմանը, որ Սահմանադրական փոփոխությունների վերաբերյալ նախորդ նիստին հայտնի է, որ մասնակցել են երկու կորոնավիրուսով վարակված պատգամավոր, Մակունցն ասաց, որ այդ տեղեկատվությունն իրականությանը չի համնապատասխանում, սակայն պատգամավորները տեղյակ են պահել անմիջապես, երբ տեղյակ են եղել այդ մասին։ Մակունցը վստահեցրեց, որ նիստերի օրը որևէ մեկը չի ներկայացել, ով նախապես իմացել է, որ վարակակիր է։

Հարցին, թե արդյո՞ք Հրայր Թովմասյանի լիազորությունները, ով գնացել է արձակուրդ, դադարել են, Մակունցը պատասխանեց, որ այդ հարցադրումը քաղաքական դաշտից դուրս է և դրան պետք է անդրադառնան իրավաբանները։

Աղբյուր` Փաստինֆո