Փաստ ինֆո

ԱԺ-ում սկսվել է արտահերթ նստաշրջանը։ Օրակարգում «Սահմանադրական դատարանի մասին» սահմանադրական օրենքում և «Պաշտոնատար անձանց գործունեության ապահովման սպասարկման և սոցիալական երաշխիքների մասին» փոփոխություններ և լրացումներ կատարելու մասին օրենքի նախագծերի փաթեթը և հանրաքվեն չեղարկելու վերաբերյալ նախագիծն է։

ԱԺ «Իմ քայլը» խմբակցության պատգամավոր Սուրեն Գրիգորյանը նշեց, որ նախագծերի փաթեթով փոփոխվում է ՍԴ դատավորների թափուր տեղերի համար առաջադրող մարմինների առաջադրման հերթականությունը. «Առաջին առաջադրումը կատարվելու է կառավարության կողմից, այնուհետև Հանրապետության նախագահի և դատավորների ընդհանուր ժողովի կողմից։ Այս փոփոխությունը պայմանավորված է այն հանգամանքով, որ եթե հերթականությունները պահպանվեն գործող խմբագրությամբ, այն է՝ Հանրապետության նախագահ, դատավորների ընդհանուր ժողով և կառավարություն, կխախտվի Սահմանադրության 166-րդ հոդվածի առաջին մասի այն պահանջը, որ առաջադրող երեք սուբյեկտները երեքական թեկնածու են առաջադրում»,-ասաց Սուրեն Գրիգորյանը։

Փոփոխություններ և լրացումներ են կատարվում նաև ՍԴ-ի մասին սահմանադրական օրենքի 88-րդ հոդվածում, որի անհրաժեշտությունը պայմանավորված է Սահմանադրության 213-րդ հոդվածով կատարված փոփոխություններով. «Այս հոդվածում ուժը կորցրած են ճանաչվում այն բոլոր դրույթները, որոնք ի սկզբանե այս կամ այն կերպ հնարավորություն էին նախատեսում դատավորներին գնալ այսպես կոչված վաղ կենսաթոշակի։ Հոդվածում ամրագրվում է նաև, որ ՍԴ անդամներին, դատավորներին, որոնց լիազորությունները դադարել են լիազորությունների ժամկետն ավարտելու հիմքով, նշանակվում է կենսաթոշակ օրենքով սահմանված կարգով»,-նշեց պատգամավորը։

Վերջինս նշեց՝ հնարավոր է լիազորությունները դադարեցված ՍԴ երեք դատավորներին մակագրվել են ընթացիկ վարույթ ընդունված գործեր, հետևաբար նախատեսվում է, որ սահմանված ժամկետում հրավիրվի աշխատակարգային նիստ, որպեսզի իրենց մակագրված գործերը վերամակագրվեն։

Աղբյուր` Փաստինֆո