Փաստ ինֆո

«Եթե իրապես մարդու եկամտի միակ աղբյուրը թոշակն է, մարդը իրոք չի կարողանում գույքահարկը վճարի, էտ թոշակը օրենքով արգելանքի տակ դրվելու ենթակա չէ»,-այսօր լրագրողների հետ ճեպազրույցում ասել է ԱԺ «Իմ քայլը» խմբակցության պատգամավոր Բաբկեն Թունյանը։

Լրագրողի հարցին, թե՝ կենտրոնում բնակվում են թոշակառուներ, ովքեր չեն կարող վճարել գույքահարկը, հաշվարկե՞լ են արդյոք՝ քանի նման թոշակառու է բնակվում կենտրոնում, և կան շատ մարդիկ, ովքեր իրենց բիզնեսը հիմնել են հենց կենտրոնում՝ մեծ տարածքներ վարձակալելով. արդյոք սա մեծ բեռ չի՞ լինի նրանց համար և չի՞ առաջացնի անշարժ գույքի գնանկում, Թունյանը պատասխանեց, որ պրակտիկորեն անհնար է հաշվել, թե քանի մարդ կա նման վիճակում կլինի, որովհետև պետք է հստակ իմանան, թե մեր համաքաղաքացիներից քանիսն են, որ ապրում են թանկարժեք բնակարաններում, իրենց գույքահարկն ինչքան է լինելու, համադրեն այդ մարդկանց իրական եկամուտների հետ։ Հասկանան՝ նրանք իրականում թոշակից բացի եկամտի այլ աղբյուր ունեն կամ չունեն։

«Ես երեկ մի վիճակագրություն էի ներկայացրել, որ Հայաստանում կա ընդամենը 9.500 բնակարան կամ ընդհանուր բնակարանների մոտ 2.5%-ը, որոնց գույքահարկը տարեկան 64.000 դրամից բարձր է լինելու»,-ասաց պատգամավորը և հավելեց, որ համայնքների ավագանին ունի մինչև իր գույքահարկի եկամուտների 10 տոկոսի չափով ֆոնդ, որով կարող է այդ շրջանակներում արտոնություն տալ կոնկրետ մարդկանց կամ չեղարկել գույքահարկը կամ հետաձգել կամ զեղչել։ Նաև պետք է համայնքապետերի համար այդ համակարգը կիրառելիս թափանցիկության որոշակի չափորոշիչներ ապահովեն։

Աղբյուր` Փաստինֆո