Փաստ ինֆո

Այսօր ՀՀԿ երիտասարդական կազմակերպությունը՝ շուրջ 100 ակտիվիստներով նամակ հանձնեց ԵՄ պատվիրակությանը՝ ի նշան բողոքի։

ՀՀԿ երիտասարդական կազմակերպության ղեկավար Հայկ Մամիջանյանը գրասենյակի մուտքի մոտ լրագրողներին տեղեկացրեց, որ նամակում նկարագրվում է քաղաքական և իրավական տեսանկյունից այն ամենաթողությունը, որը տեղի է ունենում ՀՀ-ում՝ ՍԴ-ի հետ։ Մամիջանյանը նշեց, որ սկսել են ԵՄ պատվիրակությունից, որովհետև դեսպանը հաճախ իր կողմնակալ խոսքով, հաճախ նաև կողմնակալ լռությամբ տպավորություն է ստեղծում, թե եվրոպական միջազգային կառույցները կողմ են կամ լուռ են այս գործընթացների նկատմամբ, այնինչ՝ թե՛ Վենետիկի հանձնաժողովը, թե՛ ԵԽ-ն, թե՛ ԵԺԿ-ն արդեն արտահայտել են իրենց կարծիքն այս ամենաթողության նկատմամբ։ Ըստ Մամիջանյանի՝ արտակարգ դրությունը պահպանվում է այն նպատակով, որ նման ակցիաներ հնարավոր չլինի իրականացնել, մինչդեռ՝ բոլոր մասնակիցները դիմակներով են, հնարավորինս պահպանվում է սոցիալական հեռավորություն, թեև արդեն ավանդույթ է դարձել ապօրինաբար բերման ենթարկվելը։

«Հարազատ ոստիկաններիս փոխանցում եմ, որ այստեղից ես գնալու եմ կուսակցության գրասենյակ, եթե հանկարծ չհասցնեն գան այստեղ բերման ենթարկել, կարող են ազատորեն գալ գրասենյակ և այնտեղից բերման ենթարկել»,- ասաց նա՝ նշելով, որ այդքան մարդու հնարավոր չէ պարբերաբար բերման ենթարկել։

Վերջինս շեշտեց, որ այս ակցիաներն արվում են, որ այժմյան իշխանությունները հասկանան՝ իրենք ամեն ինչ անել չեն կարող և վաղ թե ուշ, թե՛ ներքաղաքական, թե՛ միջազգային հարթակներում մեր իշխանությունների քիթը պետք է հատակին կպնի և նրանք հասկանան, որ ամեն ինչ չի, որ կարող են անել։ Ավելին նա նաեւ խոստացավ սյուրպրիզներ՝ իշխանություններին։

«Չեն կարող ասել, որ լրագրողներն են մեղավոր իրենց ձախողած կորոնավիրուսի դեմ պայքարի պարագայում, չի կարող պարոն Փաշինյանը որոշել, որ ինքը կաթողիկոս է դառնում, այդպես չի լինելու»,- ասաց Մամիջանյանը։

ՀՀԿ երիտթեւը այսօր նախատեսում է նամակների հանձնել նաեւ Հայաստանում հավատարմագրված ԵԱՀԿ երկրների բոլոր դեսպանատներին, ՄԱԿ-ի գրասենյակին։

Աղբյուր` Փաստինֆո