Փաստ ինֆո

Բավականին վտանգավոր օրենք է, հատկապես այս սոցիալական լարվածության պիկի ժամանակ, քաղաքացու դեմ ուղղված քայլերից մեկն էր։ Այս մասին լրագրողների հետ զրույցում ասաց ԱԺ ԲՀԿ-ական պատգամավոր Նաիրա Զոհրաբյանը՝ անդրադառնալով գույքահարկի մասին օրենքին։

Ինչ վերաբերում է սոցիալական ցանցում բարձրացված ֆլեշմոբին միանալուն, ապա Զոհրաբյանն ընդգծեց, որ մտավախություն բացարձակ չունի և խնդիրն ինքը չէ, իր բնակարանը շատ փոքր է, Աբովյան փողոցի վրա գտնվող «խռուշչյովկա» է և իր դեպքում գույքահարկը կարող է նույնիսկ իջնել։ Նա ընդգծեց, որ օրենքը մեծապես վնասելու է մեր հայրենակիցներին և ինքն էլ անձամբ ճանաչում է մտավորականների, ովքեր փոքր կենտրոնում ժառանգել են բնակարաններ իրենց ծնողներից ու հիմա չեն աշխատում, հետևաբար դժվա կլինի բարձր հարկ վճարել։ Զոհրաբյանն անդրադարձավ նաև «Իմ քայլը» խմբակցության պատգամավոր Հովիկ Աղազարյանի կոչին, որ եթե չեն կարողանում վճարել, ապա թող ծախեն կենտրոնի իրենց բնակարաններն ու ծայրամասեր տեղափոխվեն։

«Ես սա համարում եմ ցինիկ վերաբերմունք՝ լուրջ վաստակ ունեցող մտավորականների հանդեպ, ովքեր այդ տները ժառանգել են իրենց ծնողներից, տատերից, պապերից և հիմա, չունենալով աշխատանք, ստիպված են լինելու բավականին մեծ գումարներ վճարել»,- ասաց Զոհրաբյանը։

Աղբյուր` Փաստինֆո