Փաստ ինֆո

ԱԺ «ԲՀԿ»-ական նախկին պատգամավոր Աբրահամ Մանուկյանի նկատմամբ կալանավորումը որպես խափանման միջոց ընտրելու մասին դատարանի որոշման դեմ վերաքննիչ բողոք է ներկայացվել։ Այս մասին «Փաստինֆո»-ն տեղեկացավ պաշտպան Հրանտ Անանյանից։

Ավելի վաղ տեղեկացրել ենք, որ հունիսի 27-ին Երևանի ընդհանուր իրավասության դատարանը՝ դատավոր Կարեն Ֆարխոյանի նախագահությամբ, բավարարել է «ԲՀԿ»-ական նախկին պատգամավոր Աբրահամ Մանուկյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը։ Պաշտպանը դատարանի որոշումը որակել էր որպես ակնհայտ անհիմն և ապօրինի։

«Մասնագիտական շրջանակներին «հայտնի» դատավոր Կ.Ֆարխոյանը կատարեց իր մշտական առաքելությունը ԱԱԾ-ի հանդեպ, կալանավորեց մարդուն՝ երեք տարի 4 ամիս վաղեմության միջին ծանրության ենթադրյալ հանցանքի մեղադրանքով, որի շրջանակներում բոլոր քննչական գործողությունները ըստ էության ավարտվել են, այդ գործողություններին միջամտելու վտանգներ այլևս չկան, հունիսի 14-ից պատշաճ ներկայացել է քննությանը »,- հայտարարել էր Անանյանը՝ ընդգծելով նաև, որ Մանուկյանին մեղադրանք է առաջադրվել մի մարդու ցուցմունքի հիման վրա, ով պարբերաբար փոխել է ցուցմունքը և մեկ այլ գործով մեղադրյալ է։
ԱԱԾ-ում քննվող քրեական գործի շրջանակներում նախկին պատգամավորի ձերբակալության մասին հայտնի դարձավ հունիսի 17-ին, ապա նա ազատ արձակվեց, քանի որ դատարանը ոչ իրավաչափ է համարել նրա ձերբակալությունը։ Ազատ արձակվելուց հետո Մանուկյանին մեղադրանք է առաջադրվել ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալուն օժանդակելու համար եւ վարույթն իրականացնող մարմինը նրան կալանավորելու միջնորդություն ներկայացրեց դատարան։
Նշենք, որ Աբրահամ Մանուկյանը եղել է ԱԺ երկու գումարումների պատգամավոր 2003-2007թթ եղել է ՀՀԿ խմբակցության պատգամավոր, իսկ 2012-ին՝ «Բարգավաճ Հայաստան» կուսակցության։

Հիշեցնենք, որ «Բարգավաճ Հայաստան» կուսակցության ղեկավար Գագիկ Ծառուկյանին անձեռնմխելիությունից զրկելու եւ նրան ազատությունից զրկելու թույլտվություն ստանալու վերաբերյալ միջնորդությունը ներկայացնելու ընթացքում , մասնավորապես՝ 2017թ խորհրդարանական ընտրությունների ժամանակ «Բարգավաճ Հայաստան» կուսակցության կողմից ընտրողներին ընտրակաշառք տալու վերաբերյալ քրեական գործի մասին փաստական տվյալներ ներկայացնելիս նշել էր նաեւ Աբրահամ Մանուկյանի անունը։ Ըստ գլխավոր դատախազի ներկայացրած միջնորդագրի՝ Գագիկ Ծառուկյանի հետ պայմանավորվածության համաձայն՝ անհրաժեշտ ծախսերն ապահովելու համար դիմել են Սեդրակ Առուստամյանին եւ Աբրահամ Մանուկյանին։

Հեղինակ՝ Իզաբել Սահակյան

Աղբյուր` Փաստինֆո