Փաստ ինֆո

«Սահմանադրական դատարանի մասին» սահմանադրական օրենքում փոփոխություն կատարելու համար անհրաժեշտ է 88 կողմ քվե, մինչդեռ՝ հայտնի է, որ մի շարք պատգամավորներ գտնվում են մեկուսացված և ինքնամեկուսացված կարգավիճակում։ ԱԺ աշխատակազմի ղեկավարը հայտնել էր 6 վարակակրի եւ 12 ինքնամեկուսացած պատգամավորի մասին։ Եթե 18 պատգամավոր մեկուսացված է կամ ինքնամեկուսացված, ուստի՝ չեն կարող մասնակցել ԱԺ նիստերին և «Իմ քայլը» խմբակցությունը չի կարող ապահովել 88 քվե։ Այս մասին «Փաստինֆո»-ի հետ զրույցում ասաց ԱԺ աշխատակազմի նախկին ղեկավար, «Հայրենիք» կուսակցության անդամ Արսեն Բաբայանը։

«Բայց եկեք չմոռանանք, որ մենք ունենք մի խմբակցություն, որն ունի 17 անդամ, խոսքը՝ «Լուսավոր Հայաստան» խմբակցության մասին է և ունենք 1 անկախ հռչակված երեսփոխան, որի հետ միասին դառնում են 18 պատգամավոր և ես չեմ բացառում, որ Նիկոլ Փաշինյանին կհաջողվի իր գրպանային իշխանությանը բերել ու քվեարկել տալ, բայց ընդհանուր առմամբ, իշխանությունը չի կարող հասնել այդ արդյունքին, որովհետև չունի 88 պատգամավոր այս դեպքում, որոնք կարող են ներկայանալ»,- ասաց Բաբայանը։

Դիտարկմանը, որ օրենքում փոփոխություններ չկատարելու դեպքում կստացվի, որ անորոշ ժամկետով չունենք ՍԴ, Բաբայանն արձագանքեց՝ նշելով, որ կստեղծվի ճգնաժամ ՍԴ-ում, ինչի մասին խոսում էր։
Նրա խոսքով՝ լուրջ իրավաբանների միտքն այնքան լավը կլինի, որ կհասկանան, որ չի կարելի Սահմանադրության 213-րդ հոդվածը որևէ կերպ կիրառել։

«Այսպես, թե այնպես հնարավոր չէ այն կիրառել, քանի որ այն ընդունվել է Սահմանադրության խախտմամբ, բայց այս դեպքում կմնա այն իրավիճակը, որը կար մինչև 213-րդ հոդվածի փոփոխությունը և իշխանությունը պետք է փորձի օրինական ճանապարհով հասնել իր ցանկալի արդյունքին, ինչն օրինական ճանապարհով անհնար է, որովհետև իրենց նպատակն օրինական չէ։ Ցանկությունը ՍԴ մեծամասնության յուրացումն է, իսկ նման ցանկություններին հնարավոր չէ հասնել օրինական ճանապարհով»,- ասաց Բաբայանը։

Նրա խոսքով՝ այս պահին ստացվում է, որ ունենք Սահմանադրությանը հակասող Սահմանադրություն։
«Այսինքն՝ քանի որ Սահմանադրությունն ամբողջական փաստաթուղթ է, Սահմանադրության մեջ ունենք մի հոդված՝ 213-րդ հոդվածը, որը հակասում է նույն Սահմանադրության բազմաթիվ հոդվածների, ինչն էլ հենց ստեղծում է հակասահմանադրական իրավիճակ ամբողջ երկրում»,- ասաց Բաբայանը։

Հարցին, թե արդյո՞ք ամբողջովին նոր Սահմանադրությամբ հնարավոր կլիներ առանց օրենքի խախտման լուծել խնդիրը, Բաբայանը պատասխանեց, որ հնարավոր է, բայց պետք է միշտ հիշել, որ դատավորների անփոփոխելիության խնդիրը հիմնական մեր դատական իշխանության երաշխիքներից մեկն է։

«Ես վստահ եմ, որ, եթե նոր Սահմանադրություն գրվեր, ապա եվրոպական կառույցները, մասնավորապես՝ Վենետիկի հանձնաժողովը չէր տա համաձայնություն, թեև Վենետիկի հանձնաժողովին ոչ ոք ուշադրություն չի դարձնում»,- ասաց Բաբայանը։

Հեղինակ՝ Իզաբել Սահակյան

Աղբյուր` Փաստինֆո