Փաստ ինֆո

Ոստիկանության կենտրոնական մարմնի եւ տարածքային ստորաբաժանումների, դատարանների նստավայրերի վարչական շենքերը չեն ախտահանվում։ Նման հետեւության հիմքը՝ տվյալ հաստատությունների ասելիքի բացակայությունն է։

Արտակարգ դրության պայմաններում  կորոնավիրուսի դեմ պայքարը ձախողելով իշխանությունները վարակի տարածման ամբողջ պատասխանատվությունը դրեցին ժողովրդի վրա՝ մեղադրելով հակահամաճարակային կանոնները չպահպանելու մեջ։ «Փաստինֆո»-ն գրավոր հարցմամբ դիմել էր հասարակության լայն շերտերի հետ շփում ունեցող պետական գերատեսչություններին՝  պարզելու համար՝ 2020 թվականի մարտի 16-ից հունիսի 14-ն ընկած ժամանակահատվածում ինչ քայլեր են ձեռնարկվել պարետի՝ հակահամաճարակային ցուցումները կատարելու, ախտահանումների կազմակերպումն ապահովելու ուղղությամբ։

Նշենք, որ սանիտարահամաճարակային կանոնների պահպանման, դրանց խախտման դեպքում հնարավոր վտանգների և աշխատանքների կազմակերպման վերաբերյալ պարետի սահմանած ուղեցույցի համաձայն՝ օրական առնվազն երկու անգամ պետք է ախտահանվեն  տարածքը՝ դռների բռնակները, սեղանները, ձեռքով հաճախակի հպման մակերեսները (սարքերի մակերեսներ, լույսի անջատիչներ, սարքավորումների վրայի բռնակները, հեռակառավարման վահանակներ, ընդհանուր օգտագործման հեռախոսներ, համակարգիչներ, ստեղնաշարեր և մկնիկեր, բանկերում և այլ կազմակերպություններում՝ հաճախորդների կամ տարբեր անձանց կողմից օգտագործվող գրիչներ և այլն), սանհանգույցները, ձեռքերի հպման համար նախատեսված մակերեսները: Ոստիկանությունը դատարանները, քննչական մարմինները այն կառույցներն, որոնք լայն շփում են ունենում հասարակության տարբեր շերտերի հետ, բայց պարզվում է՝ այդ կառույցներում ախտահանում չի իրականացվում։ Համենայն դեպս՝ մեր գրավոր հարցմանն ի պատասխան նշված հաստատությունները չեն արձագանքել ու չեն պատասխանել, թե ինչպես են կազմակերպում ախտահանման աշխատանքները։

Ի տարբերություն՝ ոստիկանության եւ դատական դեպարտամենտի,  արձագանքել է Քննչական կոմիտեն, խոստացել պատասխանել՝ ՊԵԿ-ը։

ՀՀ Քննչական կոմիտեն տեղեկացրել է, որ «Հակահամաճարակային միջոցառումների շրջանակներում Հայաստանի Հանրապետության քննչական կոմիտեում ախտահանման աշխատանքները կազմակերպելու նպատակով ձեռք են բերվել համապատասխան ախտահանման համար անհրաժեշտ նյութեր (նատրիումի հիպոքլորիդ և այլն), որոնք տրամադրվել են ՀՀ քննչական կոմիտեի կենտրոնական մարմնին, ինչպես նաև՝  տարածքային ստորաբաժանումերին:

Վարչական շենքերի ախտահանման աշխատանքներն իրականացվել և իրականացվում են Հայաստանի Հանրապետության քննչական կոմիտեի աշխատակիցների  (մաքրուհիների, ինչպես նաև տեխնիկական անձնակազմի) կողմից:

Ախտահանման աշխատանքներն իրականացվում են շաբաթը 2 անգամ բոլոր ստորաբաժանումներում: Աստիճանավանդակները, վերելակները և բռնակները ախտահանվում են ամեն օր: Քաղաքացիների համար վերելակների, անցակետերի,  ինչպես նաև շքամուտքում կատարված են 1.5 մետր հեռավորությամբ գծանշումներ՝ սոցիալական հեռավորությունը պահպանելու նպատակով, ինչպես նաև միջանցքներում հարմարեցված են դոզատորներ՝ մշտական ապահովված ալկոգելով:

Վարչական շենքեր մուտք գործելիս պարտադիր կատարվում է ջերմաչափում, ինչպես նաև տրամադրվում դիմակներ:

Բացի այդ, 2020 թվականի մարտի 16-ից մինչև հունիսի 14-ն ընկած ժամանակահատվածում ԱԻՆ ծառայության հատուկ ստորաբաժանումների կողմից ամիսը մեկ անգամ կատարվել են լայնածավալ ախտահանման աշխատանքներ:

Մեր կողմից ուղարկված հարցման մեջ ՀՀ Քննչական կոմիտեից խնդրել էինք տեղեկատվություն տրամադրել նաև այն մասին, թե որքա՞ն գումար է ծախսվում կառույցում ախտահանման աշխատանքների իրականացման համար։ Մեզ տրամադրված պաշտոնական տեղեկատվության համաձայն, 2020 թվականի մարտի 16-ից մինչև հունիսի 14-ն ընկած ժամանակահատվածում, միջոցառումների կազմակերպման համար ծախսվել է  3.103.400 (երեք միլիոն հարյուր երեք հազար չորս հարյուր) ՀՀ դրամ:

Աղբյուր` Փաստինֆո