Փաստ ինֆո

ՍԴ նոր դատավորները կլինեն ոչ լեգիտիմ։ Այս մասին «Փաստինֆո»-ի եթերում ասել է փաստաբան Երվանդ Վարոսյանը։

«Վերջին փոփոխություններն ընդունվել են Սահմանադրության խախտմամբ, բնականաբար նոր դատավորները չեն լինելու լեգիտիմ, ՍԴ-ն էլ չի լինելու այն մարմինը, որը պետք է լինի Սահմանադրությամբ։ Սա էլ նշանակում է, որ մեր պետության մեջ ինչ -որ բան խաթարվեց, այսինքն՝ մենք արդեն ունենք ապալեգիտիմ իշխանություն՝ իշխանության բոլոր ճյուղերը միասին վերցված։ Սա ինչ հետևանքի ասես, կարող է հանգեցնել »,- նշել է Վարոսյանը։

Անդրադառնալով իշխանության ներկայացուցիչների՝ լեգիտիմության վերաբերյալ պնդումներին՝ Վարոսյանն ասաց, որ յուրաքանչյուրս կարող ենք բացել, կարդալ կարգը, որը սահմանված է Սահմանադրական փոփոխությունների համար, եթե այն ԱԺ-ն է իրականացնում։

«Ցանկացած դեպքում ՍԴ եզրակացությունը պարտադիր է և դա պատահական չէ, որ գրված է այդպես։ Դա է իշխանությունների տարանջատման սկզբունքի ապահովման մեխանիզմը։ Եթե դա չլինի, ՍԴ-ն որպես այդպիսին չի էլ կարող գոյություն ունենալ։ Դա նշանակում է, որ իշխանության մի ճյուղն ինչ ուզենա կարող է անել, ինչը բացառում է իշխանությունների տարանջատման սկզբունքը»,- ասաց Վարոսյանը։

Նրա խոսքով՝ ցավն այն է, որ հասարակությունը չի էլ ուզում հասկանալ, թե իշխանությունների տարանջատման սկզբունքն իր ինչին է պետք, դրանից ինչ է փոխվելու իր կյանքում։ Վարոսյանը գտնում է, որ այդ խնդրի պատասխանատուն յուրաքանչյուրս ենք, որ շարքային քաղաքացին չի կարողացել ընկալել օրենքների պահպանման, իշխանությունների տարանջատման սկզբունքի պահպանման կապն իր սովորական կենցաղի հետ։ Դիտարկմանը, որ ուղիղ կապ չի եղել, Վարոսյանն արձագանքեց, որ եղել է միշտ և այսօր էլ կա։

«Քաղաքացուն պետք է բացատրել, որ, եթե դու ուզում ես ապրել անվտանգ, ապահով, տնտեսապես զարգացած իրավական պետության մեջ, չի կարող գալ իշխանության մի ուժ և անել ինչ ուզում է ։ Հակառակ պարագայում՝ մենք կմտնենք մի հորձանուտի մեջ, որից չենք կարողանա դուրս գալ»,- ասաց Վարոսյանը։

Դիտարկմանը, որ, եթե իշխանությունն ինչ ցանկանում անում է, ապա ինչու այդ դեպքում ԱԺ-ն որոշում ընդունեց, վարչապետը ֆեյսբուքյան գրառում կաներ, ուղիղ հանձնարարական կտար, փաստաբանն արձագանքեց՝ նշելով, որ այդ օրն էլ կգա՝ կամաց-կամաց։

«Նույն ՍԴ, այսպես կոչված, ճգնաժամի լուծման որերորդ տարբերակն էր սա և ոչ մեկն այդ տարբերակներից իրավունքներից չէր բխում։

Նույն այս ջատագովները նույն եռանդով պնդում էին, որ նախորդ իրենց որոշած լուծումներն լավագույնն էին, օրինական էին, իսկ երեկ անգամ ՀՀ արդարադատության նախարարն է ընդունում, որ մոռացել են Սահմանադրական օրենքում փոփոխություններ մտցնել, բայց դա չի խանգարում կյանքի կոչել այն, ինչ ուզում են։ Եթե չի խանգարում, ապա ինչու եք ասում, թե արագացված ռեժիմով դա էլ կփոխեք »,- ասաց Վարոսյանը։

Մանրամասները՝ տեսանյութում։

Աղբյուր` Փաստինֆո