Փաստ ինֆո

Մենք միշտ ունենք տնտեսական, առողջապահական և սոցիալական խնդիրների մեջ ճիշտ բալանս պահելու անհրաժեշտությունը։ Այս մասին ճեպազրույցի ժամանակ ասաց ՀՀ վարչապետ Նիկոլ Փաշինյանը՝ անդրադառնալով ԱՀԿ եվրոպական տարածաշրջանային բյուրոյի տնօրենի հայտարարությանը։ Նշենք, որ վերջինս հայտարարել էր, որ կառույցը մտահոգված է Եվրոպայում կորոնավիրուսի ակտիվ տարածման դինամիկայով և կարծում է, որ նոր ակտիվացումը պայմանավորված է կարանտինային սահմանափակումների մեղմացմամբ։ 

«Ապրիլին մեր երկրում 70 հազար աշխատատեղ փակվել է, և մեզ համար ակնհայտ էր, որ եթե այդ ռեժիմը շարունակվի, կարող ենք իսկապես սոցիալական կոլապսի առաջ կանգնել։ Մեզ համար ակնհայտ է, որ պետք է մաքսիմալն անենք կորոնավիրուսի հետ համատեղ ապրելու հմտություն ձեռք բերելու համար։ Ինչ վերաբերում է կանոններին, երկու օր առաջ այցելել էր ԱՀԿ ներկայացուցիչը և փորձեցի նրանց գնահատականը լսել մեր կողմից ձեռնարկված կանոնների մասին։ Ըստ էության արձանագրեցինք, որ կանոնները գոնե հիմա ունիվերսալ են և խնդիրը կանոնների պահպանման որակի մեջ է։ Այսինքն` մեզ ոչ մի նոր խորհուրդ չի տրվել, դրանք նույնն են՝ դիմակ, սոցիալական հեռավորություն և ձեռքերի ախտահանում։ ԱՀԿ ներկայացուցիչը նույնիսկ ասաց, որ այս պահին, ցավոք, չունեն պատվաստանյութ և հայտնի չէ, թե երբ կունենան և մինչև չկա իրական արդյունավետությունն ապացուցած պատվաստանյութ, պատվաստանյութը մնում է դիմակը»,-ասաց Նիկոլ Փաշինյանը։

Վարչապետն ընդգծեց, որ այսօր մեր մեծագույն խնդիրը բակերն են, թաղումները, հոգեհանգստյան արարողությունները և այս պրոցեսի մեջ ներգրավված յուրաքանչյուր մարդու մոտ անհատական վարքագծի փոփոխություն պետք է տեղի ունենա. «Մեր ռազմավարությունն այն է, որ պետք է մաքսիմալ բարձր որակով կարողանանք կորոնավիրուսի հետ համատեղ ապրել, բայց մենք երբեք չենք բացառել, որ կարող է գալ մի իրավիճակ, երբ նորից գնանք համընդհանուր սահմանափակումների՝ հասկանալով, որ դա կարող է ջարդել մեր տնտեսության ողնաշարը, բայց մարդկանց կյանքերը փրկելու այլ տարբերակ պարզապես չլինի»,-ասաց Նիկոլ Փաշինյանը։

Աղբյուր` Փաստինֆո