Փաստ ինֆո

Մեր հետագա քայլերը պետք է լինեն դատական կարգով մեր իրավունքների պաշտպանությունը։ Այս մասին այսօր լրագրողների հետ զրույցում ասաց ՍԴ դատավոր Ալվինա Գյուլումյանը՝ անդրադառնալով հարցին, թե ինչ են պատրաստվում անել։

«Եթե գտնում են, որ ներպետական դատարաններ չկան այդ մասին, ուրեմն կդիմենք ՄԻԵԴ»,-ասաց Ալվինա Գյուլումյանը։
Դիտարկմանը, որ ՀՀ արդարադատության նախարար Ռուստամ Բադասյանն ասել է՝ սահմանադրական այս փոփոխությունները տարածվում են նաև իր վրա, Ալվինա Գյուլումյանն ընդգծեց, որ օրենքում բերված «ընդհանուր տևողություն» եզրույթը վերաբերվում է սահմանադրական փոփոխություններից առաջ և հետո, բայց ոչ մեկ ժամկետ առաջ. «Հիմա գնամ կենսագրությունս բերեմ, կարող է դպրոցում էլ եմ ՍԴ անդամ եղել, էդ էլ գումարեն, ասեն՝ մի բան էլ ավել ես»,-ասաց Ալվինա Գյուլումյանը։

Հարցին՝ արտերկրից վերադառնալուց հետո դատարան էր դիմել՝ գումար ստանալու համար, հետևաբար իրեն դատավո՞ր է համարել, Ալվինա Գյուլումյանն ասաց. «Իհարկե ես ինձ համարել եմ դատավոր, որովհետև ստաժի հավելավճարը ոչ միայն ՍԴ անդամի կամ դատավորի համար է, այլ ցանկացած ատյանում դատավոր աշխատելու համար։ Իմ բերած փաստարկը վերաբերվել է նրան, որ ես, լինելով ՄԻԵԴ-ում, նույնպես եղել եմ դատավոր և հետևաբար պետք է շարունակվի, դրանք տարբեր բաներ են։ Այս հարցում դիտավորյալ թյուրըմբնում կա, որովհետև նա, ով այդ մասին հայտարարել է, շատ լավ գիտի, որ ես վկայակոչել եմ նոր դատական օրենսգիրքը, որտեղ ՄԻԵԴ-ում իմ պաշտոնավարումն ամրագրվեց, որ Հայաստանի մասնակցությամբ միջազգային դատարանում փորձառությունը, պաշտոնավարումը նույնպես համարվում է դատավորի աշխատանք։ Երբ այդ նորմն ուժի մեջ մտավ, ինչու 2014թ.-ին դատարան չդիմեցի, որովհետև կառավարությունից պատասխան եղավ, որ մեր օրենսդրությամբ միջազգային դատարանում պաշտոնավարումը դատական աշխատանքի փորձ չի համարվում։ Հետո եղավ դատական օրենսգիրքը, որտեղ դա արդեն համարվեց փորձ, և ես դրանից հետո կրկին դիմեց ՍԴ-ին և ասացի, որ քանի որ արդեն օրենսդրությամբ նախատեսված է, այդ կարգով հաշվարկել իմ հավելավճարը»,-ասաց Ալվինա Գյուլումյանը։

Վերջինս ընդգծեց, որ պատկան մարմիններից ակնկալում են համապատասխան ձևակերպված փաստաթուղթ, որը կվերաբերվի իրենցից յուրաքանչյուրին. «Դատարանի շենքից հեռանալ-չհեռանալը խնդիր չեմ համարում։ Վերջին երեք ամիսների ընթացքում մենք դատարանի շենքում երևացել ենք դեպքից դեպք։ Սա դատարան է, ընդ որում կոլեգիալ մարմին է համարվում և բնականաբար եթե կգտնեն, որ ես այդտեղ չպետք է լինեմ ու դատարանն էլ թույլ չի տա նիստերին մասնակցել, չեմ պատրաստվում ուժով դա անել, ուղղակի կպայքարեմ իմ իրավունքների համար»,-ընդգծեց Ալվինա Գյուլումյանը։

Աղբյուր` Փաստինֆո