Փաստ ինֆո

Քիչ առաջ հայտնի դարձավ, որ ԱԺ պատգամավոր Տիգրան Ուրիխանյանը միանում է Սահմանադրական փոփոխությունները վիճարկելու համար նախաձեռնած ստորագրահավաքին։ «Փաստինֆո»-ի հետ զրույցում պարգամավորը մանրամասնեց. «Հենց այս պահին պատրաստվում եմ միանալ ԲՀԿ-ի կողմից նախաձեռնած ստորագրահավաքին։ Սա կուսակցության որոշումն է՝  որպես ընդդիմադիր և հասարակության ընդդիմադիր շահերը մշտապես սպասարկող  կուսակցության որոշումը»։

Մեր այն հարցին՝ արդյո՞ք այս  որոշումը որևէ կապ ունի ԱԺ «Լուսավոր Հայաստան» խմբակցության այսօր տարածած հայտարորության հետ, Տիգրան Ուրիխանյանը պատասխանում է. «Այո, որոշումը կապ ունի «Լուսավոր Հայաստան» խմբակցության հայտնած դիրքորոշման հետ, որովհետև նրանց ստորագրություններից է կախված այդ փաստաթղթի ճակատագիրը»։

Ավելի վաղ  «Ալյանս» ցենտրիստական կուսակցությունը հայտարարություն էր տարածել, որում մասնավորապես նշված էր. «2015 թվականին հիմնադրված «Ալյանս» ցենտրիստական կուսակցության երիտասարդական թևի հասարակայնության հետ կապերի պատասխանատուի ժամանակավոր պաշտոնակատար Արսեն Գաբրիելյանը, պաշտոնապես պատասխանելով ՀՀ ԱԺ Լուսավոր Հայաստան խմբակցության քարտուղար մեծարգո պարոն Գ. Գորգիսյանին, հայտնում է, որ «Ալյանս» կուսակցությունը, որպես իրապես ընդդիմադիր քաղաքական ուժ, գոհունակություն է հայտնում, որ ԱԺ-ում իր ներկայացուցիչ պատգամավորի մեկնաբանությունները զգոնության ու սթափության աստիճանի ազդեցություն ունեցան Լուսավոր Հայաստանի մեր չափազանց հարգելի գործընկերների համար, և հարգարժան պարոն Գորգիսյանը, չպատասխանելով Միքայել Մինասյանին, որն անվանել էր Էդմոն Մարուքյանին պսևդոիրականության ստրուկ, ինչ-որ պատասխաններ էր գրել իրենց չափազանց հարգալից ու կոռեկտ քննադատած պատգամավորին, հայտարարեց, որ նրանք պատրաստ են ստորագրել ՍԴ դիմելու ձևաթուղթը։ Սիրով հայտնում ենք, որ ԱԺ-ում մեր ներկայացուցիչ պատգամավոր Ուրիխանյանը լիազորվել է կուսակցության կողմից ստորագրել ձևաթուղթը, և հիմա տեղի է ունենում այդ գործընթացը, որից հետո մնում է միայն Ձերը։ Ժողովրդի ընդդիմադիր հատվածը Ձեզ է սպասում և հույսով է, որ կմնաք Ձեր խոսքի տերը ու չեք խաբի»։

Աղբյուր` Փաստինֆո