Փաստ ինֆո

Վարչապետը պետական պաշտոնյա է և ենթակա ու հաշվետու է խորհրդարանին։ Այս դեպքում վարչապետը խախտում է օրենսդրությունը և Սահմանադրությունը՝ առաջ քաշելով իր չափանիշները, թե ով պետք է լինի խորհրդարանում, իսկ ով՝ չպետք է լինի։ «Փաստինֆո»-ի հետ զրույցում նման կարծիք արտահայտեց քաղաքագետ Ստեփան Դանիելյանը։

Հիշեցնենք, որ այսօր ԱԺ-ում 2019թ.-ի բյուջեի կատարողականի քննարկման ժամանակ ՀՀ վարչապետ Նիկոլ Փաշինյանն ասաց, որ հաջորդ խորհրդարանում ներկայացված են լինելու միայն այնպիսի քաղաքական ուժեր, որոնք աներկբայորեն պաշտպանում են 2018 թվականի ոչ բռնի, թավշյա հեղափոխության արժեքները։

Քաղաքագետը կարծում է՝ վարչապետը գերազանցել է իր լիազորությունները և օրինական երկրում նրան դրա համար պատասխանատվության կենթարկեին. «Ինչ վերաբերում է նրան, թե ով իրավունք ունի խորհրդարանում լինել, իսկ ով՝ ոչ, ապա խորհրդարանում իրավունք ունեն լինել այն քաղաքական ուժերը, որոնց գործունեությունը համապատասխանում է օրենսդրությանը, մասնավորապես կուսակցությունների մասին օրենքին և որոնց ձայն է տալիս ժողովուրդը։ Իր վրա վերցնել ժողովրդի կարծիքն արտահայտելը նույնպես վարչապետի լիազորությունների գերազանցում է։ Ով իրավունք ունի, ով՝ ոչ, որոշում է օրենքը»,-ասաց Ստեփան Դանիելյանը։

Ընդ որում` վերջինիս համար անհասկանալի են այն արժեքները, որոնց մասին խոսվում է, որովհետև հեղափոխության ժամանակ հեղափոխության հռչակագիր չի եղել, որտեղ նշված լինեն այդ արժեքները, հետևաբար քաղաքագետը կարծում է՝ արժեքների մասով հստակություն չկա. «Եթե իրենք հեղափոխությունից հետո նոր չափանիշներ են առաջ քաշում, ապա այդ արժեքները պետք է ներառվեն օրենսդրության մեջ։ Պետք է փոխվեր կուսակցությունների մասին օրենքը և այդտեղ արտահայտված լինեին այդ հեղափոխական արժեքները։ Այսինքն` կուսակցությունների մասին օրենքում պետք է դրվեն հստակ չափանիշներ և չափորոշիչներ՝ ով իրավունք ունի խորհրդարան մտնել և ոչ իրավունք չունի, ինչպես նաև ո՞ր կուսակցություններն են լուծարվում՝ այս կամ այն պահանջներից ելնելով։ Դա չի արվել, իսկ ինչ վերաբերում է վարչապետի հայտարարությանը, ապա այն դեմագոգիա է և իրավասությունների գերազանցում»,-ասաց քաղաքագետը։

Անդրադառնալով ընդդիմադիր ԲՀԿ-ի հասցեին հնչած արտահայտություններին, Ստեփան Դանիելյանը նկատեց՝ գուցե ԲՀԿ-ն ընտրակաշառք բաժանել է, գուցե չի բաժանել դա այլ հարց է, սակայն վարչապետը մեղադրանք կարդալու իրավունք չունի. «Եթե եղել են նման դեպքեր, պետք է լինի դատական գործ և եթե դատական գործում ապացուցվի, այդ կուսակցությունը թող լուծարվի։ Շատ լավ կլիներ, որ նախապես կուսակցությունների մասին օրենքում և քրեական օրենսգրքում հստակություն մտցվեր, որ եթե որևէ ուժ ընտրակաշառք է բաժանում, և դա ապացուցվում է, ապա պետք է լինեն ինչ-որ սանկցիաներ։ Երկու տարվա ընթացքում, սակայն, ո՛չ քրեական օրենսգրքում է ինչ-որ փոփոխություն մտցվել, ո՛չ էլ կուսակցությունների մասին օրենքում է այդ ամենը գրվել, ավելին, դեռ դատական ակտերով էլ ընտրակաշառքներն ապացուցված չեն։ Այս առումով նման մեղադրանքներ անելը նշանակում է իր վրա է վերցնում դատական իշխանության լիազորությունները։ Մեղադրանք է կարդում, մեղադրանքից ելնելով արդեն իմպերատիվ կերպով ինչ-որ հետևություններ անում»,-նշեց Ստեփան Դանիելյանը՝ հավելելով, որ ժողովրդի անունից հանդես գալը դասական դեմագոգիայի մեջ է մտնում։

Հարցին՝ արդյոք վարչապետի այդ հայտարարությունները որևէ ազդեցություն կարո՞ղ են ունենալ այդ գործերի հետագա ընթացքի վրա, քաղաքագետն ասաց. «Կարող են ունենալ, կարող են չունենալ։ Չեմ կարող տեսակետ հայտնել մի բանի մասին, որը դեռ չի եղել»,-հավելեց Ստեփան Դանիելյանը։

Աղբյուր` Փաստինֆո