Փաստ ինֆո

Երեկ լրատվամիջոցներն ու սոցցանցերը հեղեղված էին ժողովրդին դիմակներ բաժանող կառավարության անդամներով: Նրանցից շատերն, ակնհայտ շփոթված էին և սեփական ափսեում չէին զգում իրենց, քանի որ ակնհայտ էր՝ իրենց բաժանած դիմակներն առոչինչ էին, այսինքն, ոչ մի արժեք չունեին:

Դա, ըստ ամենայնի, վարչապետ Փաշինյանի քմահաճույքի հերթական օրինակներից մեկն էր, որի նպատակը պոպուլիզմն էր, ցուցադրանքը և վստահաբար, կոնկրետ հասցեատեր ուներ այն:

Այլապես, դժվար է ՕԳԳ գտնել Երևանի փողոցներում հատուկենտ մարդիկ գտնելով՝ նրանց 1-2 դիմակ բաժանելու մեջ:

Օգտակար գո՞րծ էիք ուզում անել, պարոնայք ՔՊ-ականներ, ձեր հումանիտար դիմակներով ու ձեռնոցներով հրատապ կարգով գնայիք Ազգային Ժողով, ուր արդեն կորոնավիրուսի լուրջ օջախ է հասունանում: Արդեն իսկ տարբեր աղբյուրների համաձայն մեկ տասնյակից ավելի և գնալով շատացող վարակակիրներ և մեկուսացածներ կան ԱԺ պատգամավորների մեջ , մինչդեռ մինչև վերջերս, ասենք՝ 2-3 օր առաջ նրանցից ոմանք, օրինակ ԱԺ պատգամավոր Քրիստինե Պողոսյանը երբ առանց ձեռնոցների գրկում էր ԱԺ ամբիոնն՝ իր գործընկերներին մարգինալներ անվանելու համար, վարակակիր էր և, բնականաբար, շատ հնարավոր է՝ առիթ դառնա /եթե արդեն չի դարձել/ նոր վարակակիրեերի: Նույն կերպ՝ մյուսները:

Այնպես որ, դիմակներ բաժանելու ձեր հույժ մարդասիրական ակցիան իրականացրե՛ք ձեր իսկ գործընկերների շրջանում, որ անսիմպտոմ կորոնավիրուսի պարագայում օրական բազմաթիվ մարդկանց վարակի աղբյուր են դառնում:

Եվ ընդհանրապես, մենք կարծես թե գործ չունենք ճգնաժամային վիճակում գտնվող երկրի օրենսդիր և գործադիր իշխանությունների հետ, որոնք մի տեսակ մրցակցության մեջ են՝ սեփական ժողովրդին մինչև վերջ քամելու առումով՝ սկսած զանազան հորինած տուգանքներից ավարտած՝ հարկահանության համատեքստում առյուծիբաժին հանդիսացող գույքահարկի բարձրացմամբ:

Ձեր հումանիզմը դրսևորեք իրական խնդիրներում, այլ ոչ թե՝ 50-60 դրամանոց դիմակներ բաժանելով: Ամենաբարդ օրերին չեք բաժանել, հիմա երևի փիարի, եվրոպական կառույցներին ցուցադրելու խնդիր ունեք, դռնեդուռ եք ընկել:

Ի վերջո, արտակարգ դրության մեջ նորանոր հարկեր մոգոնող, գույքահարկ բարձրացնող, մարդասիրության 0 տոկոսանոց օրենսդիրներ ու գործադիրներ, ժողովրդի անունից խոսելիս, հիշեք, որ դուք մինչ այժմ ի շահ ժողովրդի ոչինչ չեք արել:

Հեղինակ՝ Մ.Մ.

Աղբյուր` Փաստինֆո