Փաստ ինֆո

ԲԴԽ-ն հեռացավ խորհրդակցական սենյակ՝ Վերաքննիչ քրեական դատարանի դատավոր Ալեքսանդր Ազարյանին կարգապահական պատասխանատվության վերաբերյալ որոշում կայացնելու։

Փաստաբան Տիգրան Աթանեսյանը նշեց, որ զրկված են պաշտպանական իրավունքից և մրցակցային դատավարություն խորհրդում ևս չի ստացվում, քանի որ զրկվել են իրենց դեմ վկայող անձին հարցաքննելուց՝ հասկանալու շարժառիթները։ Բացի այդ՝ Աթանեսյանը նշեց, որ ԲԴԽ-ն հնարավորություն ունի զարգացնելու օրենսդրությունը՝ դատական համակարգի բոլոր դատավորներին տալով հստակ ուղեցույցներ և չափանիշներ, թե ինչքան կարող են նրանք խոսել։

«Եթե մեղավոր կգտնեք պարոն Ազարյանին, պետք է արձանագրենք, որ դատավորներն իրավունք չունեն խոսել։ Եթե ոչ՝ մերժվի կարգապահական պատասխանատվության ենթարկելու մասին միջնորդությունը, ապա կլինի հույս, որ դատական համակարգը կշարունակյի շնչել»,- ասաց Աթանեսյանը։

ՀՀ արդարադատության նախարար Ռուստամ Բադասյանն էլ ասաց, որ իր համար ակնհայտ էր, որ դատավարության ընթացքում որոշակի վարքի դրսևորումը բխել է նախկինում այլ պաշտոնատար անձանց կողմից արված որոշ հայտարարություններից։ Դատավոր Ալեքսանդր Ազարյանը չցանկացավ ամփոփիչ ելույթ ունենալ։

Որոշումը կհրապարակվի հուլիսի 9-ին՝ ժամը 14։10-ին։

Ավելի վաղ տեղեկացրել ենք, որ Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ է հարուցվել արդարադատության նախարարի կողմից՝ ապրիլին:
Կարգապահական վարույթի հարուցման պատճառը «5-րդ ալիք» ՀԸ սեփականատեր Արմեն Թավադյանի խափանման միջոցի գործով դռնփակ դատական նիստում հնչեցված գնահատականն է:

Արձանագրենք, որ Ալեքսանդր Ազարյանը համարվում է լավագույն դատավորներից մեկը։ Նա երկու տարի շարունակ ճանաչվել է տարվա ամենաբարձր վարկանիշ ունեցող դատավոր, իսկ 2020թ. հունիսի 1-ի դրությամբ՝ նա կրկին ունի ամենաբարձր վարկանիշը՝ 76 միավորով:
Բարձր վարկանիշ ունեցող դատավոր Ալեքսանդր Ազարյանի նկատմամբ աննախադեպ ճնշումներն սկսվել են 2018թ օգոստոսին Ռոբերտ Քոչարյանի խափանման միջոցը վերացնելուց հետո. կայացված դատական ակտով արձանագրվել էր, որ ՀՀ երկրորդ նախագահ Ռոբերտ Քոչարյանն ունի գործառութային անձեռնմխելիություն, ինչը չի հաղթահարվել։ Ճնշումների երկրորդ ալիքը սկսվեց, երբ դատարանը՝ դատավոր Ալեքսանդր Ազարյանի նախագահությամբ, բավարարեց Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը՝ նշելով, որ բացակայում է հիմնավոր կասկածը։

Հեղինակ՝ Իզաբել Սահակյան

Աղբյուր` Փաստինֆո