Փաստ ինֆո

ԱՄՆ-ի Ռոդ Այլենդ նահանգի Կրանստոն քաղաքի ոստիկանությունն ավարտել է քաղաքագետ Սերգեյ Խրուշչովի՝ ԽՄԿԿ Կենտկոմի առաջին քարտուղար Նիկիտա Խրուշչովի որդու, մահվան հանգամանքների հետաքննությունը: Այս մասին ՏԱՍՍ-ին հայտնել է քաղաքի ոստիկանական վարչության ներկայացուցիչը։

Իրավապահները երրորդ կողմից բռնի գործողություններ չեն հայտնաբերել, իշխանությունները չեն ծրագրում որեւէ մեկին մեղադրանք ներկայացնել Խրուշչովի մահվան կապակցությամբ:

«Մենք մանրակրկիտ հետաքննություն ենք անցկացրել։ Այս պահին չի նախատեսվում որեւէ մեկին մեղադրանք ներկայացնել հանցագործություններ կատարելու համար։ Գործը փակված է», - աղբյուրի խոսքը մեջբերում է գործակալությունը։ Սակայն զրուցակիցը հրաժարվել է ճշտել, թե արդյոք Խրուշչովը ինքնասպանություն է գործել, թե դժբախտ պատահար է տեղի ունեցել, հավելելով, որ ոստիկանությունը չի բացահայտում այդ տեղեկությունը «բացառապես ընտանիքի նկատմամբ հարգանքից ելնելով»:

Ավելի վաղ Սերգեյ Խրուշչովի այրին՝ Վալենտինա Գոլենկոն, հերքել էր նրա ինքնասպանությունը եւ հայտարարել, որ վերջին երկու տարին նա հիվանդ էր եւ մահացել է ծերությունից:

Խրուշչով կրտսերի մահվան մասին հայտնի է դարձել դեռ հունիսի 18-ին, սակայն հունիսի 25-ին տեղեկություն է հայտնվել նրա հնարավոր ինքնասպանության մասին: Նշվում էր, որ մարմինը հայտնաբերվել է գլխի հրազենային վնասվածքով։ Ոստիկանության տվյալներով՝ բռնության առերևույթ հետքեր չեն հայտնաբերվել։

Սերգեյ Խրուշչովը ռուսական եւ ամերիկյան քաղաքացիություն է ունեցել' 1991 - ին հայտնի գիտնական եւ հրապարակախոսին հրավիրել են Բրաունի համալսարան' սառը պատերազմի պատմության վերաբերյալ դասախոսություններ կարդալու համար: Հետագայում նա մնացել է ԱՄՆ-ում։

ԽՍՀՄ-ում Խրուշչով կրտսերը զբաղվում էր թեւավոր եւ բալիստիկ հրթիռների նախագծերի մշակմամբ, մասնակցում էր տիեզերանավերի վայրէջքի համակարգերի ստեղծմանը:

Աղբյուր` Փաստինֆո