Փաստ ինֆո

Երկու տարբեր, իրար հետ կապ չունեցող քրեական գործերով որպես վկա պետք է հարցաքննություն տամ։ Այս մասին լրագրողների հետ զրույցում ասաց Երևանի ավագանու «Լույս» խմբակցության ղեկավար Դավիթ Խաժակյանը։

Նա ասաց, որ գործը վերաբերում է «Լույս» խմբակցությանն օրենքով ամրակցված մեքենային, որն ունի վարորդ, իրականացնում է մեքենայի սպասարկումը, և վարորդին վաղ առավոտյան տնից դուրս են հանել, բերել են քրեական վարչություն. «Հետագայում նաև կնոջն են հրավիրել։ Հարցերի բնույթը և գուցե այն արդյունքը, որը կակնկալեին ոստիկանության ներկայացուցիչներն այն էր, որ դուրս գար, թե ինքը ֆիկտիվ գրանցված վարորդ է, չգիտեմ ով է փողը ստանում, ինչ է անում։ Երբ իմացա այս քրեական գործի մասին, պարզապես ծիծաղս եկավ, որովհետև իր՝ որպես աշխատակցի առնչությունները փաստաթղթավորվում են յուրաքանչյուր ամիս, ինքը ներկայանում է, փաստաթղթեր է ստորագրում և այլն, ուստի իր գործառույթների կատարման մասով ծիծաղելի է այն, ինչ անում են»,-ասաց Դավիթ Խաժակյանը։

Ինչ վերաբերում է երկրորդ քրեական գործին, որով նույնպես ներգրավված է որպես վկա, Դավիթ Խաժակյանը նկատեց՝ հաշվի առնելով ինչ գործի մասին է խոսքը և ինչ են մեղասգրել, հասկանում է, որ իշխանությունները լուրջ խնդրի առաջ են կանգնած. «Տրամաբանություն չկա, երբ իշխանությունն ուզում է քաղաքական ճնշումներ գործադրել և հիմա էլ դա անում է ավագանու ընդդիմադիր անդամի նկատմամբ։ Համոզված եմ, որ դա մեկ մարդու հանձնարարությամբ կարող է լինել, որը Նիկոլ Փաշինյանն է։ Երևում է՝ շատ է նեղվել հատկապես վերջին դեպքից հետո, երբ իր քավորի և քավորի եղբոր մասնակցությամբ միջադեպերից հետո պարզվեց, որ կա որոշակի քրեական հանցակազմ իրենց ազգականի կատարած գործառույթներում։ Հիմա եկել, ասում են՝ գիտեք ինչ ամիսներ շարունակ քեզ հետևել ենք և այ էստեղ ոնց որ ինչ-որ բան նենց չես արել»,-ասաց Դավիթ Խաժակյանը։

Նկատենք, որ «Փաստինֆո»-ի հարցմանն ի պատասխան ՔԿ-ից հայտնել էին, որ Դավիթ Խաժակյանը հրավիվել է հարցաքննության ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնում 2020թ. հունիսի 14-ին դիտավորությամբ հավաքներ կազմակերպելու և անցկացնելու, Երևան քաղաքի Նալբանդյան և հարակից Խանջյան փողոցները փակելու, երթևեկությունը խաթարելու, նոր կորոնավիրուսային հիվանդության համավարակի տարածումը կանխելու նպատակով սոցիալական հեռավորություն պահպանելու և հավաքը դադարեցնելու՝ ՀՀ ոստիկանության օրինական պահանջներին չենթարկվելու դեպքի առթիվ ՀՀ քրեական օրենսգրքի 225.1-րդ հոդվածի 1-ին մասով հարուցված քրեական գործի շրջանակներում:

Աղբյուր` Փաստինֆո