Փաստ ինֆո

Թե՛ նախկիննները, թե՛ այսօրվա գործող իշխանություններն իրավունքը ճկում են այնպես, ինչպես ցանկանում են և դա ծառայեցնում են սեփական քաղաքական նպատակներին։ Մամուլի ասուլիսի ժամանակ այս մասին ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ նկատելով, որ դա վնասում է պետականությանը։

Պատգամավորի կարծիքով այդ երկու ուժերն էլ մտածում են անձնական, քաղաքական շահերով. «Այսօրեական խնդիրներ լուծելու ուղղությամբ նրանք այնպիսի գործողություններ են կատարում, որոնք 5-10 տարի հետո մեր ամբողջ պետականության հիմքերին պետք է վնասեն։ Լավ կլինի, որ այս երկու քաղաքական ուժերը հասկանան, որ իրենք պետական գործիչներ են, այլ ոչ թե այսօրեական քաղաքական շահով առաջնորդվող գործիչներ»,-ասաց Տարոն Սիմոնյանը։

Հարցին՝ եթե նշում են, որ իրավական գործընթաց կա և խախտումներ կան, ապա ինչու են առկախում ՍԴ դիմելու գործընթացը, Էդմոն Մարուքյանն ասաց, որ իրենց դիրքորոշումը փոխանցել են «Բարգավաճ Հայաստան» խմբակցության գործընկերներին և դրա հետ կապված կա ըմբռնում, որ դիմելու են ՍԴ. «Մեր գործընկերները շատ լավ հասկանում են, որ ՍԴ դիմես այսօր, թե 10 օր հետո իրավական առումով ոչ մի տարբերություն չկա, հետևաբար ովքեր իրավաբանությունից տեղյակ չեն, նրանք կարող են դատողություն անել, որ տարբերություն կա»,-ասաց Էդմոն Մարուքյանը։

Դիտարկմանը, որ սահմանադրական փոփոխությունների նախագիծը որոշման մեջ է մտել, հետևաբար չե՞ն կարծում, որ կարճ ժամանակում ՍԴ գործող կազմի համամասնությունը կփոխվի հօգուտ իշխանության և իրենց ՍԴ դիմելն այլևս նպատակահարմար չի լինի, Էդմոն Մարուքյան նկատեց՝ իրենց դիմումը մոտ 2 շաբաթվա մեջ վարույթ կընդունի. «Հիշեք սահմանադրական հանրաքվեն, երբ ասվում էր, որ 9 դատավորից երկուսը պետք է մնան, յոթը հեռանան, որովհետև այդ յոթն ամենավատն են, նախկիններ են։ Հիմա եթե այդ յոթից երկուսին կամ անգամ երեքին են հանում, այդ բալանսը դրանից չի փոխվում»,-ասաց Մարուքյանը։

Աղբյուր` Փաստինֆո