Փաստ ինֆո

«ԼՀԿ» խմբակցությունն ամեն ինչ արեց, որ ՀՀ-ում վերջնականապես տապալվի սահմանադրական կարգը։ Այս մասին «Փաստինֆո»-ի հետ զրույցում ասել է «Հայրենիք» կուսակցության անդամ Արսեն Բաբայանը։

Ինչպես արդեն հայտնել ենք՝ ԼՀԿ խմբակցությունը հրաժարվեց միանալ ԲՀԿ խմբակցության նախաձեռնած ստորագրահավաքին, մինչդեռ՝ պնդում էին, որ սահմանադրական փոփոխությունները հակասահմանադրական են, դրանք ընդունվել են Սահմանադրությամբ նախատեսված ընթացակարգի խախտմամբ՝ առանց ՍԴ-ից եզրակացություն ստանալու։

Ըստ Ա.Բաբայանի՝ կար մեկ հնարավորություն եւ «Լուսավոր Հայաստան» կուսակցությունը կարող էր մասնակցել այդ հնարավորությանը, որպեսզի կանխվեր իշխանության յուրացումը և սահմանադրական կարգի տապալումը։ «Ոչ միայն չմասնակցեց, այլ հակառակը՝ լիարժեք օգնեց, որ գործող իշխանությունը հասնի իր նպատակին»,- նշեց բանախոսը։

«Փաստինֆո»-ի այն դիտարկմանը, որ ԼՀԿ-ն հայտարարեց, որ պատրաստվում են դիմել ՍԴ, բայց հուլիսի 7-ից հետո՝ Արսեն Բաբայանն արձագանքեց. «Լուսավոր Հայաստան» խմբակցությունը ֆոկուսնիկների խմբակցություն է։ Ուզում են ցույց տալ, թե իբրև միանում են այս նախաձեռնությանը, բայց զուգահեռ չի միանում որևէ նախաձեռնության։ Ինչ են անում իրենք, ասում են՝ այո, կստորագրենք, բայց կտանք այն ժամանակ, երբ կլինի նոր ՍԴ։ Այսինքն՝ դուք հասկանում եք չէ՞, որ ինքներդ ընդունում եք, որ այս հակասահմանադրական գործողություններն իրականացվում են ՍԴ կազմը յուրացնելու համար և հիմա ասում եք, որ ամեն դեպքում կդիմենք այն ՍԴ-ին, որը կլինի յուրացված այս իշխանությունների կողմից։ Սա իրենց սիրելի երրորդ ճանապարհն է, երրորդ ուղին է, որը երբեք որևէ մեկին օգուտ չի տալիս, բացի վնասից։ Ամեն դեպքում փաստ է, որ «Լուսավոր Հայաստան» խմբակցությունը որպես քաղաքական միավոր ընդդիմադիր դաշտում այլևս գոյություն չունի, իսկ ընդհանրապես որպես քաղաքական ուժ, վստահ եմ, երկար չի կարող գոյատևել»։

ԱԺ նախագահը հայտարարեց, որ ՍԴ չդիմելու որոշում ընդունելով կարող են նախադեպ ստեղծել, արդյոք սա իրապես նախադեպ չի դառնա, որ հնարավոր է՝ առանց ՍԴ դիմելու մի շարք օրենքներ ընդունվել։

«Այս պահին օրենքների վերաբերյալ չկա այդպիսի նախաձեռնություն, բայց այսպես շարունակվելու դեպքում, այո, օրենքներն էլ կամաց-կամաց կհանեն և՛ ՍԴ ուղարկելուց, և՛ նախագահին ուղարկելուց։ Թեև ՍԴ-ն փորձում են յուրացնել դարձնել իրենց սրտի ՍԴ-ն և արդեն էական չի լինի ՍԴ ուղարկել-չուղարկելը։ Միշտ էլ կուղարկեն ՍԴ և ինչպես կասեն, այդպես էլ կանի, ինչպես նախագահին, այսօր գիշերը ժամը 00։30-ին ստորագրի, ինչպես Էդմոն Մարուքյանին ասացին՝ հանկարծ չհամարձակվես դիմել ՍԴ և նա չհամարձակվեց դիմել։ Այսինքն՝ մենիշխանությունն ամբողջությամբ ՀՀ-ում այս պահին իրականություն է, պետք է կանխել, պետք է ուղղակի այս իշխանությանը վռնդել, որ կարողանանք ՀՀ-ում վերականգնել սահմանադրական կարգը և ժողովրդավարությունը։

Մանրամասները՝ տեսանյութում

Աղբյուր` Փաստինֆո