Փաստ ինֆո

Նշվում է, որ սահմանադրական այդ փոփոխություններով երեք դատավորների լիազորությունները պետք է դադարեն, բայց այդ փոփոխություններով կարող են դադարել երկու դատավորների լիազորությունները՝ բացի ՍԴ դատավոր Ալվինա Գյուլումյանի լիազորություններից։ Այս մասին այսօր մամուլի ասուլիսի ժամանակ ասաց «Լուսավոր Հայաստան» խմբակցության ղեկավար Էդմոն Մարուքյանը։

«Լուսավոր Հայաստան» խմբակցության պատգամավոր Տարոն Սիմոնյանն էլ պնդեց, որ իրենց կարծիքով ՍԴ դատավոր Ալվինա Գյուլումյանի վրա այս փոփոխությունները չեն տարածվում, որովհետև նա 2014 թվականին է ստանձնել ՍԴ դատավորի իր պաշտոնը և հետևաբար 12 տարին չի լրացել. «Իշխանությունները հաշվարկում էին 90-ական թվականների նրա նշանակումը որպես դատավոր, բայց պետք է հաշվի առնենք, որ այդ նշանակումից հետո ինքն աշխատանքից ազատվել է, գնացել է Եվրոպական դատարանում դատավոր է աշխատել, նորից վերադարձել է ու նշանակվել։ Եթե սա լիներ կասեցման գործընթաց և շարունակվեր ժամանակի ընթացքում, ուրիշ տրամաբանություն կլիներ։ Բայց քանի որ չի կասեցվել, այսինքն անձն աշխատանքից դուրս է եկել, այլ աշխատանքի է անցել, հետո նորից՝ նույն ընթացակարգով ընդունվել է աշխատանքի, պետք է հաշվենք տիկին Գյուլումյանի աշխատանքային գործունեության սկիզբը 2014 թվականից»,-ասաց Տարոն Սիմոնյանը։

Էդմոն Մարուքյանն էլ նկատեց՝ սա նույնն է, որ օրինակ «Իմ քայլը» խմբակցության պատգամավոր Վահագն Հովակիմյանը նախաձեռնի, որ իրեն մանդատից զրկեն, որովհետև Սահմանադրությամբ պատգամավորը 5 տարվա մանդատով է ընտրվում, իսկ ինքն արդեն 8 տարի է, ինչ պատգամավոր է։ Հարցին՝ բացառու՞մ է արդյոք, որ նման նախաձեռնություն նույնպես կլինի, Էդմոն Մարուքյանն ասաց. «Չեմ բացառում, դրա համար անունն էլ ասացի, թե ով կարող է անել»,-ասաց Մարուքյանը։

Աղբյուր` Փաստինֆո