Փաստ ինֆո

Երևանի ընդհանուր իրավասության դատարանի դատավոր Արտուշ Գաբրիելյանը, ԱԺ նախկին պատգամավոր Աբրահամ Մանուկյանի խափանման միջոցի վերաբերյալ որոշում կայացնելու գործով խորհրդակցական սենյակում գտնվելով, քննել է այլ քրեական գործեր։ Այս մասին «Փաստինֆո»-ի հետ զրույցում ասաց Աբրահամ Մանուկյանի պաշտպան Հրանտ Անանյանը։

Նրա փոխանցմամբ՝ այդ հիմքով դատավորին ինքնաբացարկի միջնորդություն են ներկայացրել գրավոր, որը քննարկվել է այսօր առավոտյան։ Պաշտպանի փոխանցմամբ՝ այսօր դատարանը պետք է հրապարակեր խափանման միջոցի վերաբերյալ որոշումը, սակայն պաշտպանական կողմն իմացել է, որ խորհրդակցական սենյակում գտնվելու ընթացքում դատավորը քննել է այլ գործեր, որի իրավունքը վերջինս չուներ։

Քիչ առաջ դատարանը, վերադառնալով խորհրդակցական սենյակից, բավարարել է փաստաբանի ինքնաբացարկի միջնորդությունը։ Նշենք, որ դա պաշտպանական կողմի արդեն երկրորդ ինքնաբացարկի միջնորդությունն էր։ Ինչպես նշեց Անանյանը՝ առաջին միջնորդությունը պաշտպանական կողմը ներկայացրել է մինչ կալանավորման միջնորդության քննությունը։
«Կալանավորումը որպես խափանման միջոց ընտրելու մասին միջնորդությունը դեռ դատարան մուտք չարած, քաղաքում խոսակցություն կար, որ այն կմակագրվի դատավոր Արտուշ Գաբրիելյանին։ Հետագայում պարզվեց, որ ինչ -որ կերպ հենց Արտուշ Գաբրիելյանին է մակագրվել»,- նշեց փաստաբանը։

Ավելի վաղ տեղեկացրել ենք, որ հունիսի 17-ին հայտնի դարձավ, որ Աբրահամ Մանուկյանը ձերբակալվել է ԱԱԾ-ում քննվող քրեական գործի շրջանակներում, ապա ազատ է արձակվել՝ դատարանի որոշմամբ, քանի որ դատարանը նրա ձերբակալման որոշումը համարել է ոչ իրավաչափ։ Ազատ արձակվելուց հետո Մանուկյանին մեղադրանք է առաջադրվել ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալուն օժանդակելու համար եւ վարույթն իրականացնող մարմինը նրան կալանավորելու միջնորդություն է ներկայացրել դատարան։ Մանուկյանի նկատմամբ կալանավորումը որպես խափանման միջոց ընտրելու մասին միջնորդության վերաբերյալ դատարանի որոշումը պետք է հրապարակվեր այսօր։

Նշենք, որ Աբրահամ Մանուկյանը եղել է ԱԺ երկու գումարումների պատգամավոր, մասնավորապես՝ Աբրահամ Մանուկյանը 2003-2007թթ եղել է ՀՀԿ խմբակցության պատգամավոր, իսկ 2012-ին՝ «Բարգավաճ Հայաստան» կուսակցության։
Հիշեցնենք, որ «Բարգավաճ Հայաստան» կուսակցության ղեկավար Գագիկ Ծառուկյանին անձեռնմխելիությունից զրկելու եւ նրան ազատությունից զրկելու թույլտվություն ստանալու վերաբերյալ միջնորդությունը ներկայացնելու ընթացքում , մասնավորապես՝ 2017թ խորհրդարանական ընտրությունների ժամանակ «Բարգավաճ Հայաստան» կուսակցության կողմից ընտրողներին ընտրակաշառք տալու վերաբերյալ քրեական գործի մասին փաստական տվյալներ ներկայացնելիս նշել էր նաեւ Աբրահամ Մանուկյանի անունը։ Ըստ գլխավոր դատախազի ներկայացրած միջնորդագրի՝ Գագիկ Ծառուկյանի հետ պայմանավորվածության համաձայն՝ անհրաժեշտ ծախսերն ապահովելու համար դիմել են Սեդրակ Առուստամյանին եւ Աբրահամ Մանուկյանին։

Հեղինակ՝ Իզաբել Սահակյան

Աղբյուր` Փաստինֆո