Փաստ ինֆո

Սահմանադրության մեջ կատարված փոփոխությունները չեն կարող ինձ վերաբերվել, որովհետեւ ես պաշտոնավարում եմ 2014-ի օգոստոսից, իսկ պարտկանությունների կատարմանն անցել եմ հոկտեմբերի 1-ից: Այս մասին,ՍԴ-ի մոտ լրագրողների հետ զրույցում ասել է ՍԴ դատավոր Ալվինա Գյուլումյանը։

Հիշեցնենք, որ երեկ ԱԺ մեծամասնությունը ընդունեց սահմանադրական փոփոխությունների նախագիծը, որով նախատեսվում է դադարեցնել 12 տարուց ավելի պաշտոնավարած ՍԴ անդամների լիազորությունները: Նախագծի հեղինակ ԱԺ պատգամավոր Վահագն Հովակիմյանը հայտարարել է, որ այն տարածվելու է երեք դատավորի վրա, իսկ Հրայր Թովմասյանի պաշտոնավարումը՝ ՍԴ նախագահի պաշտոնում կդադարեցվի եւ նա կմնա որպես ՍԴ դատավոր։

Դիտարկմանը, որ ըստ երեւույթին հաշվարկվում է նաեւ նախկինում իր ՍԴ անդամ եղած ժամականահատվածը, Գյուլումյանը պատասխանեց. «Դա թողնում եմ ձեր տրամաբանությանը: Ես գտնում եմ, որ այո, պետք է պաշտոնավարեմ»:
Նա հավելեց, որ չի կարծում, որ բանը կհասնի դատական կարգով վիճարկելուն. «Դա իշխանության ընդունած օրենքն է եւ այդ օրենքի համապատասխան այդ նորմն ինձ վրա չի տարածվում»:

«Ես Եվրոպական դատարանից մեկ տարի շուտ վերադարձել եմ՝ լավ հաշվարկելով, որ այդ մեկ տարվա ընթացքում ես կստանայի այնքան աշխատավարձ, որքան այստեղ ընդհուպ մինչև 70 տարեկան պաշտոնավարելու դեպքում, դեռ մի բան էլ ավելի։ Բայց ես մտածել եմ, որ ունեմ այն ուժը, կարողությունները, որ կարողանամ իմ ձեռք բերած գիտելիքներն օգտագործել այստեղ։ Ինչ-որ մարդկանց համար դա հիմար որոշում է թվացել, ինչպե՞ս կարելի է Եվրոպան թողնել, հետ գալ, նույնիսկ ուղիղ այդպիսի արտահայտություններ են եղել։ Դա իմ տեսակն է, ես եկել եմ, որպեսզի իմ երկրում կարողանամ իրավունքի զարգացմանը նպաստել»,-նշեց ՍԴ փոխնախագահը։

Գյուլումյանը չցանկացավ գնահատական տալ ներկայացված որոշման վերաբերյալ. «Նախ վաղ է դրա համար, երկրորդն էլ չեմ բացառում, որ որեւէ մեկը կդիմի ՍԴ եւ ես չեմ ուզում ինձ կաշկանդել հետագայում այդ գործի քննությանը մասնակցելուց»:

ՍԴ փոխնախագահն ընդգծեց՝ իր պաշտոնավարումն ինքնանպատակ չէ։

Ինչ վերաբերում է Վենետիկի հանձնաժողովի կարծիքին ու դրա արձագանքին, ՍԴ փոխնախագահը նկատեց, հանձնաժողովի ռեկոմենդացիաներում կան այնպիսի կետեր, որոնց իշխող քաղաքական ուժը չի հետևել։

«Բայց դրանք իհարկե խորհրդատվական եզրակացություն են։ Հնարավոր քննության կողմից, դրանք ևս հաշվի կառնվեն, այդ պատճառով այս առումով ևս ձեռնպահ կմնամ մեկնաբանությունից»,- ասաց նա։

Նշենք, որ փոփոխություններն ընդունվել են առանց փոփոխությունների վերաբերյալ ՍԴ եզրակացությունն ստանալու։

Աղբյուր` Փաստինֆո