Փաստ ինֆո

Հրայր Թովմասյանի համար նախկին իշխանություն, նոր իշխանություն, հին իշխանություն ասածները հարյուրերորդական են։ Հրայր Թովմասյանը գլուխը կախ գալիս իր աշխատանքն անում ու գնում է։ Այս մասին այսօր լրագրողների հետ զրույցում ասաց Սահմանադրական դատարանի նախագահ Հրայր Թովմասյանը։

«Երեկ ինչ-որ մեկը հայտարարեց, որ էս գործընթացը երջանիկ ապրելու համար է, որ այստեղ քաղաքական ոչ մի բան չկա, և ամեն ինչ անում են, որ մարդիկ երջանիկ ապրեն։ Նենց որ հավատացեք և վաղվանից երջանիկ եք ապրելու։ Ես ուզում եմ հավատալ մեր պատգամավորներին, որ էս փոփոխություններից հետո Դուք բոլորդ երջանիկ եք ապրելու»,-ասաց ՍԴ նախագահը։
Հարցին՝ դատավորների և իր հետագա գործունեության հետ կապված որևէ գործողություն իրականացվում է, Հրայր Թովմասյանն ասաց, որ աշխատանքի է եկել, այսօր քննարկումներ, նիստեր ունի։

Հրայր Թովմասյանն ընդգծեց՝ ՀՀ 2015 թվականի խմբագրությամբ Սահմանադրությամբ գրված է, թե սահմանադրությունն ինչպես կարող է փոփոխվել. «Այդ փոփոխման մի փուլը ՍԴ-ն է։ Ես ասում եմ, որ ՍԴ-ն նման փաստաթուղթ չի ստացել։ Երբ ՍԴ-ն քննության առարկա էր դարձրել ՀՀ ՍԴ-ի մասին օրենքը, էդ ժամանակ ինչի՞ ոչ մեկի մտքով չէր անցնում։ Ամբողջ խնդիրը հետևյալն է, որ Սահմանադրական դատարաններն այնպիսին են, որ իրենց վերաբերյալ հարցերը ևս կարող են լուծել, և՛ Վենետիկի հանձնաժողովը, և՛ միջազգային բոլոր փաստաթղթերում հստակ նշված է։ Պարզապես այս դեպքում իրենք ավելի մեծ զսպվածություն պետք է ցուցաբերեն, քան այլ հարցերում»,-նշեց ՍԴ նախագահը։

Դիտարկմանը, որ ՍԴ-ն չի կարող դրական եզրակացություն տալ մի նախագծի, որով ինքներդ զրկվում եք ՍԴ նախագահի պաշտոնից, Հրայր Թովմասյանն արձագանքեց. «Ո՞վ ասաց՝ չի կարող։ Այդպիսի հարց չկա, որը ՍԴ-ն քննի և տեսականորեն իրեն չվերաբերվի, որովհետև ՍԴ-ն մի հոգու վերաբերյալ հարց չի քննարկում։ Կենսաթոշակներին, հարկերին վերաբերվող, այս բոլոր հարցերը վերաբերում են նաև ՍԴ անդամներին։ Որևէ պաշտոն ինքնանպատակ չէ, որևէ պաշտոն հավերժ չէ։ Եթե կվերաբերվի հատուկ մեկ հոգու, ապա մեր օրենքներով նշված է՝ կմասնակցի այդ գործին, չի մասնակցի։ Այդ բոլորը կանոնակարգված է։ Եթե այդ տեսանկյունից նայենք, ապա մի դեպքում կնշանակի ընդհանրապես սահմանադրական արդարադատություն չես ունենում էդ հարցերով, ասում ես՝ ոչինչ, հաշվի առնելով, որ իրենք կարող է կողմնակալ լինեին, ուրեմն սա դուրս է սահմանադրական վերահսկողությունից։ Էդ կանխավարկածը ձեզ ո՞վ է տվել, որ ՍԴ-ն կարող է կողմնակալ լինի։ Օրինակ ասում են՝ որոշել ենք ՍԴ բոլոր անդամներին գնդակահարել, բայց որ ուղարկենք ՍԴ իրենք կողմնակալ կարող է լինեն, եկեք չուղարկենք ՍԴ։ Մոտավորապես դա է»,-ասաց Հրայր Թովմասյանը։

Աղբյուր` Փաստինֆո