Փաստ ինֆո

Ես 25 տարի ծառայել եմ իմ ժողովրդին, ոչ մի իշխանության չեմ ծառայել։ Ժողովուրդն է ինձ ասել՝ կարող եմ այստեղ մնալ, ժողովուրդն էլ կարող է ասել՝ ինձանից հոգնել է, գնամ տուն։ Լրագրողների հետ զրույցում այս մասին ասաց ՍԴ դատավոր Ֆելիքս Թոխյանը՝ անդրադառնալով Սահմանադրության փոփոխության նախագծին։

«Վենետիկի հանձնաժողովի խորհրդատվական կարծիքում մի քանի տեղ նշված է, որ նոր եկած իշխանությունները չպետք է խախտեն դատավորների անփոփոխության սահմանադրական սկզբունքը։ Ես կգնամ, ոչ մի խնդիր չունեմ, բայց մեզանից հետո ստեղ պետք է գան չէ՞։ Իշխանությունների փոխվելուց հետո էն նույն իշխանությունն ինչ է անելու, ասելու է՝ եկեք մերոնք չեք։ Էս անգամ երեք հոգի են հանում, նրանք 13 հանեն, տենց չի լինի»,-ասաց ՍԴ դատավորը։

Վերջինս նկատեց՝ որևէ մեկը կասկածու՞մ է, որ բոլոր իրավական միջոցներով պայքարելու են որևէ խախտման դեմ։ Հարցին՝ ինչ քայլեր են ձեռնարկելու, Ֆելիքս Թոխյանն ասաց, որ չգիտի, կյանքում այս վիճակի մեջ չի ընկել, որ պետության դեմ պետք է պայքարի և իրավական ձևով ապացուցի, որ ճիշտ չէ. «Ես գտնում եմ՝ դեռ որոշակի խելամիտ բաներ կգտնվեն։ Թյուր է այն կարծիքը, դեմագոգիա է, որ էստեղ ինչ-որ թշնամիներ են նստած, իրենք ինչ-որ դավադրություն են ուզում անել, եկեք մի հատ ափալ-թափալ իրենց հարցը լուծենք, որ այդ ենթադրաբար դավադրությունը չանեն։ Չկա տենց բան, հերյուրանք է»,-ասաց Ֆելիքս Թոխյանը։

Անդրադառնալով անհրաժեշտության դեպքում ՄԻԵԴ դիմելու հարցին, Ֆելիքս Թոխյանն ասաց, որ անհատական իրավունքների խախտում է.

«Ես օրինակ ունեմ մի քանի պարտավորություններ, ասենք վարկեր ունեմ, էդ ո՞վ է այդ վարկերը փակելու։ Կամ երեկ հարց են տալիս՝ թոշակը տալու՞ եք, իրենք էլ՝ հա տալու ենք, է մնացել էր թոշակն էլ չտաք մեզ։ Ոչ մեկ ստեղ կառչած չի էդ աթոռից։ Ես հիմա էլ առաջարկություններ ունեմ երեք բուհից, չենք կորչելու։ Խնդիրը այն է, որ ամեն ինչ անենք սահմանադրական ուղիով, ոչ հապճեպ, դիալոգով և վերջիվերջո Վենետիկն ասել է՝ անցումային շրջան տուր մարդկանց»,-ասաց ՍԴ դատավորը։

Աղբյուր` Փաստինֆո