Փաստ ինֆո

Ռոբերտ Քոչարյանի և մյուսների դատախազը միջնորդեց սահմանափակել միջնորդություն ներկայացնելու փաստաբանների իրավունքը. Նիստը հետաձգվեց

ՀՀ երկրորդ նախագահ Ռոբերտ Քոչարյանի և մյուսների գործով դատական նիստը հետաձգվեց՝ Յուրի Խաչատուրովի պաշտպանի բացակայության հիմքով։ Բանն այն է, որ պաշտպան Միհրան Պողոսյանը կոնտակտ է ունեցել կորոնավիրուսով վարակված քաղաքացու հետ։ Թեև նրա մոտ կորոնավիրուսի այս պահին չի հայտնաբերվել, բայց փաստաբանը կասկածներ ունի եւ ինքնամեկուսացել է։ Երևանի ընդհանուր իրավասության դատարանում կայացած դատական նիստի մեկնարկին մեղադրող դատախազ Գևորգ Բաղդասարյանը միջնորդություն ներկայացրեց՝ խնդրելով դատարանին սահմանափակել պաշտպանական կողմի՝ տարբեր տեսակի միջնորդություններ ներկայացնելու դատավարական իրավունքը՝ գտնելով, որ պաշտպանական կողմը չարաշահում է այն։

Բաղդասարյանն ընդգծեց, որ դատավարական իրավունքների լայն շրջանակ վերապահելը հիմնված է անմեղության կանխավարկածի վրա և այն ենթադրում է, որ վերապահված իրավունքները պետք է իրացվեն դրանց բովանդակությանը համապատասխան և այնպես, որ այն չխախտի վարույթի մասնակիցների իրավունքները։

«Հակառակ իրավիճակն իրավունքի չարաշահում է, որը պետք է հանգեցնի համապատասխան դատավարական հետևանք՝ չարաշահվող իրավունքի սահմանափակման »,- ասաց Բաղդասարյանը՝ նշելով, որ իրավունքների չարաշահման դեպքում դատավարության մասնակիցը իրացնում է իրեն վերապահված իրավունք, հետևաբար՝ վերջինիս վարքագիծը ֆորմալ առումով համապատասխանում է օրենքին։

Նախագահող դատավոր Աննա Դանիբեկյանը, դատախազի միջնորդությունը լսելուց հետո, ասաց, որ հնարավոր չի համարում միջնորդության քննությունն այսօրվա դատական նիստին՝ հաշվի առնելով այն հանգամանքը, որ Յուրի Խաչատուրովի պաշտպան Միհրան Պողոսյանը բացակայում է, ուստի որոշում կայացրեց դատական նիստը հետաձգելու մասին։
Հաջորդ դատական նիստը նշանակվել է հունիսի 30-ին՝ ժամը 13։00-ին։

Նշենք, որ այս դատական նիստին ներկա էր նաև ՀՀ երկրորդ նախագահ Ռոբերտ Քոչարյանը, ով դատարան է մուտք գործել ոչ գլխավոր մուտքից։

Ինչպես ավելի վաղ հայտնել ենք՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, ՀՀ երկրորդ նախագահ Ռոբերտ Քոչարյանի նկատմամբ խափանման միջոց է կիրառվել գրավը՝ 2 մլրդ ՀՀ դրամի չափով։ Դատարանի դեպոզիտ հաշվին գրավի գումարը փոխանցելուց հետո Ռոբերտ Քոչարյանն ազատ է արձակվել։

Սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հեղինակ՝ Իզաբել Սահակյան

Աղբյուր` Փաստինֆո