Փաստ ինֆո

Թուրքական իշխանությունները փորձում են տպավորություն ստեղծել, որ այդ խնդրով զբաղվելու են նաև հասարակական կառույցները, իբրև թե հասարակությունը նույնպես պայքարում է հայոց ցեղասպանության իրենց ձևակերպմամբ պնդումների դեմ։ «Փաստինֆո»-ի հետ զրույցում այս մասին ասաց թուրքագետ Ռուբեն Մելքոնյանը՝ անդրադառնալով Թուրքիայում «Հայոց ցեղասպանության պնդումներին հակադարձելու և ռազմավարություն մշակելու համար» ինքնուրույն քաղաքացիական նոր կառույցի ստեղծմանը։

Թուրքագետը նկատեց՝ սա ևս մեկ անգամ վկայում է, որ թուրքական պետությունը Հայոց ցեղասպանության խնդիրը շարունակում է պահել իր առաջնահերթությունների մեջ և որևէ հետընթաց քայլ չի անում. «Կեղծիքի իրենց քաղաքականությունը շարունակում է մնալ առաջնային, լինել պետության հոգածության ներքո և պետությունն էլ շարունակում է դրան տրամադրել քաղաքական, ֆինանսական և այլ ռեսուրսներ։ Սա պետք է նաև մեզ համար սգոնացնող կամ զգաստացնող փաստ լինի։ Մեր հասարակության մեջ անհիմն խաղաղասիրական պնդումներն այն մասին, իբրև թե Թուրքիայում ժողովրդավարական փոփոխություններ են, թեմայից չհասկացող տարատեսակ ՀԿ-ների ներկայացուցիչների և այլնի հայտարարությունները որևէ կապ չունեն իրականության հետ։ Թուրքիան շարունակում է մնալ ագրեսիվ, սպառնալից պետություն, և շարունակում է Հայոց ցեղասպանության փաստի հերքման իր քաղաքականությունը՝ ընդգրկելով նորանոր ռեսուրսներ ու նորանոր ոլորտներ»,-ասաց Ռուբեն Մելքոնյանը։

Վերջինս ընդգծեց՝ այս կառույցը չի կարող ինքնուրույն լինել, քանի որ Էրդողանի հսկողության ներքո է լինելու։ Նրա խոսքով, քանի որ թուրքական պաշտոնական դիվանագիտությունն արդեն իսկ հենված է կեղծիքի վրա, սա մի քայլ է, որ հանրային դիվանագիտություն կոչված ոլորտում նույնպես շարունակվում է թուրքական կեղծիքների քաղաքականությունը։ Ռուբեն Մելքոնյանը կարծում է՝ երբ կառույցի կազմը հստակ լինի, ակնհայտ կդառնա, որ ընդգրկված մարդիկ ոչ միայն անկախ չեն, այլև տարբեր կերպ կապված են թուրքական պետության հետ և մեր քայլերը պետք է լինեն համարժեք. «Մենք պետք է մեր պաշտոնական քաղաքականությունը հայոց ցեղասպանության միջազգային ճանաչման և թուրքական կեղծիքների դեմ պայքարի էլ ավելի հստակեցնենք, ուժեղացնենք, ավելի շատ տեղ տանք մասնագիտական կարծիքներին։ Իշխանություններըչպետք է առաջնորդվեն ամենագետի կանխավարկածով, որ իրենք տիրապետում են բոլոր խնդիրներին, այլ լսեն մասնագետներին և հնարավորինս դաշտը թողնեն մասնագետներին, այլ ոչ թե տարբեր գրանտասեր անձանց ու կազմակերպություններին»,-հավելեց թուրքագետը։

Ավելի վաղ հայտնել ենք, որ Թուրքիայում արտաքին քաղաքականության հիմնական ուղղություններից մեկի՝ «Հայոց ցեղասպանության պնդումներին հակադարձելու և ռազմավարություն մշակելու համար» ինքնուրույն և քաղաքացիական նոր կառույց է ստեղծվելու։ Էրդողանն իր հավանությունն է տվել ծրագրին և հրահանգել վայրկյան առաջ սկսել աշխատանքները։

Աղբյուր` Փաստինֆո