Փաստ ինֆո

ԱԺ նախկին պատգամավոր Աբրահամ Մանուկյանին մեղադրանք է առաջադրվել մեկ անձի ցուցմունքով ։ Այս մասին «Փաստինֆո»-ի հետ զրույցում ասաց փաստաբան Հրանտ Անանյանը՝ հավելելով, որ Մանուկյանն իրեն առաջադրված մեղադրանքը չի ընդունում։

Անանյանը տեղեկացրեց, որ անձը, ում ցուցմունքի հիման վրա մեղադրանք է առաջադրվել, քրեական հետապնդման մարմիններից կախվածություն ունեցող անձ է, մեկ այլ քրեական գործով մեղադրյալ է եւ պարբերաբար փոխել է ցուցմունքները։

«Որեւէ տրամաբանություն չկա, օրինակ՝ 5-րդ ցուցմունքը դիտարկել որպես բացարձակ ճշմարտության աղբյուր։ Ցուցմունքը փոխել է հունիսի 15-ին»,- ասաց Անանյանը։

Ինչ վերաբերում է կալանավորման հիմքերին, պաշտպանն ասաց, որ դրանք բացակայում են, ողջամիտ չեն։ Անանյանի խոսքով՝ Մանուկյանը ծանր հիվանդություններով է տառապում, ո՞ւր պետք է թաքնվի։

Բացի այդ՝ Անանյանը վստահեցրեց, որ գործի ծավալները հաշվի առնելով, գործի քննությունը չի կարող ավարտվել եւ վերջնական դատավճիռը չի կարող ուժի մեջ մտնել երկու տարում, մինչդեռ՝ երեք տարի առաջ տեղի ունեցած միջին ծանրության հանցագործության պատասխանատվության ենթարկելու ժամկետը հինգ տարի է, այսինքն՝ վաղեմության ժամկետը կանցնի մինչեւ դատավճռի ուժի մեջ մտնելը։

«Եթե դատավճռի կատարման, ապահովման առերեւույթ անհրաժեշտություն չկա, ակնհայտ է, որ կալանավորումը որպես խափանման միջոց կիրառելը կամ ինքնանպատակ է, կամ այլ նպատակ է հետապնդում»,- ասաց Անանյանը՝ նշելով, որ կան քրեական պատասխանատվության ենթարկելու ժամկետներ եւ միջին ծանրության հանցագործության համար առավելագույնը նախատեսվում է հինգ տարի եւ ժամկետը լրանալուց հետո չեն կարող անձին պատասխանատվության ենթարկել։ Նա նաեւ տեղեկացրեց, որ առայսօր Մանուկյանի դեմ ցուցմունք տված անձի հետ առերեսում չի եղել։

Բացի այդ՝ Անանյանը բարձրացնելով քննչական ենթակայության խնդիրը, ասաց, որ քրեական հետապնդումն իրականացվում է ոչ պատշաճ սուբյեկտի՝ ԱԱԾ-ի կողմից։ Պաշտպանը նաեւ նշեց, որ Մանուկյանի նկատմամբ քրեական հետապնդում հարուցելու համար անհրաժեշտ էր ԱԺ-ի համաձայնությունը, քանի որ Մանուկյանին վերագրվում է արարք, որը վերաբերում է նրա պատգամավոր եղած ժամանակահատվածին, ուստի՝ նա օգտվում է անձեռնմխելիության երաշխիքներից։

Ավելի վաղ տեղեկացրել ենք, որ հունիսի 17-ին հայտնի դարձավ, որ Աբրահամ Մանուկյանը ձերբակալվել է ԱԱԾ-ում քննվող քրեական գործի շրջանակներում, ապա ազատ է արձակվել՝ դատարանի որոշմամբ, քանի որ դատարանը նրա ձերբակալման որոշումը համարել է ոչ իրավաչափ։ Ազատ արձակվելուց հետո Մանուկյանին մեղադրանք է առաջադրվել ՀՀ քրեական օրենսգրքի 38-154.2-րդ հոդվածի 2-րդ մասի հատկանիշներով՝ ընտրակաշառք տալուն օժանդակելու համար եւ վարույթն իրականացնող մարմինը նրան կալանավորելու միջնորդություն է ներկայացրել դատարան։ Պաշտպան Հրանտ Անանյանը տեղեկացրեց, որ խափանման միջոցի վերաբերյալ առաջին դատական նիստին Մանուկյանի ինքնազգացողությունը վատացել էր և դատական նիստը հետաձգվել էր։ Հունիսի 22-ին դատական նիստը կայացել է և Երևանի ընդհանուր իրավասության դատարանը՝ դատավոր Արտուշ գաբրիելյանի նախագահությամբ, հեռացել է խորհրդակցական սենյակ՝ խափանման միջոցի վերաբերյալ որոշում կայացնելու։ Դատարանի որոշումը կհրապարակվի հունիսի 24-ին։

Նշենք, որ Աբրահամ Մանուկյանը եղել է ԱԺ երկու գումարումների պատգամավոր, մասնավորապես՝ Աբրահամ Մանուկյանը 2003-2007թթ եղել է ՀՀԿ խմբակցության պատգամավոր, իսկ 2012-ին՝ «Բարգավաճ Հայաստան» կուսակցության։

Հիշեցնենք, որ «Բարգավաճ Հայաստան» կուսակցության ղեկավար Գագիկ Ծառուկյանին անձեռնմխելիությունից զրկելու եւ նրան ազատությունից զրկելու թույլտվություն ստանալու վերաբերյալ միջնորդությունը ներկայացնելու ընթացքում , մասնավորապես՝ 2017թ խորհրդարանական ընտրությունների ժամանակ «Բարգավաճ Հայաստան» կուսակցության կողմից ընտրողներին ընտրակաշատք տալու վերաբերյալ քրեական գործի մասին փաստական տվյալներ ներկայացնելիս նշել էր նաեւ Աբրահամ Մանուկյանի անունը։ Ըստ գլխավոր դատախազի ներկայացրած միջնորդագրի՝ Գագիկ Ծառուկյանի հետ պայմանավորվածության համաձայն՝ անհրաժեշտ ծախսերն ապահովելու համար դիմել են Սեդրակ Առուստամյանին եւ Աբրահամ Մանուկյանին։

Հեղինակ՝ Իզաբել Սահակյան

Աղբյուր` Փաստինֆո