Փաստ ինֆո

Վենետիկի հանձնաժողովը, դրական գնահատելով և դրական համարելով այն մոտեցումը, որ անհրաժեշտ են լուծումներ, կարծում է, որ պետք է հաշվի առնվեր նաև իրենց այն առաջարկը, որը նախատեսում էր անցումային փուլ և ափսոսանք է հայտնել, որ այդ հատվածը չենք ներառել նախագծում։ Լրագրողների հետ զրույցի ժամանակ այս մասին ասաց ԱԺ «Իմ քայլը» խմբակցության ղեկավար Լիլիթ Մակունցը։

Անդրադառնալով հարցին, թե ինչու չեն ներառել, Լիլիթ Մակունցն ասաց, որ Վենետիկի հանձնաժողովի կարծիքը խորհրդատվական է, և այն պարտադիր բնույթ չի կրում. «Այնտեղ նաև նշվում է, որ ՀՀ իշխանությունները, իրավիճակը գնահատելով, պետք է որոշումներ կայացնեն նաև անցումային փուլի տևողության առումով։ 2018 թվականից հետո, երբ ձևավորվեց ՍԴ, անցումային թուլն այդ ժամանակվանից սկսված էր և 1.5 տարի անցել է այդ ժամանակահատվածից, որպեսզի լարվածոթյունն այդ ամենի շուրջ էլ ավելի չխորանա, չգեներացվի լարվածություն, «Իմ քայլը» խմբակցությունը հավանության է արժանացնում այն տեսակետը, որ այս պահին անցումային փուլ պետք չէ»,-ասաց Լիլիթ Մակունցը․

Թե ինչու չսպասեցին հանձնաժողովի խորհրդատվական կարծիքին, մինչ նախագիծը շրջանառելը, Լիլիթ Մակունցն ասաց, որ Արդարադատության նախարարությունը և այլ գործընկերներ ակտիվ բանակցությունների մեջ են եղել Վենետիկի հանձնաժողովի հետ կոնցեպտուալ առումով. «Քանի որ կոնցեպտուալ առումով որևէ խնդիր չի առաջացել, և մենք ունեցել ենք նախնական տեղեկատվություն, որ մինչև այդ օրը հրապարակվելու է, որոշել ենք նախագիծը շրջանառել։ Ունեցել ենք նաև նախադեպեր, երբ այդ գործընթացները եղել են զուգահեռ։ Այսինքն Վենետիկի հանձնաժողովի կարծիքը եղել է նախագիծը շրջանառելուց հետո»,-ասաց Լիլիթ Մակունցը։

Աղբյուր` Փաստինֆո