Փաստ ինֆո

Վենետիկի հանձնաժողովի առջև դրված էին մի շարք հարցեր և այն սկզբունքային հարցերին, ՍԴ այն մոդելին և առանձնահատկություններին, որոնք անհրաժեշտ են ՍԴ ճգնաժամը կանոնակարգելու համար հանձնաժողովը տվել է դրական պատասխան։ Այս մասին այսօր լրագրողների հետ զրույցում ասաց ԱԺ պետաիրավական հարցերի մշտական հանձնաժողովի նախագահ Վլադիմիր Վարդանյանը։

«Իհարկե տեխնիկական այդ վրիպակն էր տեղի ունեցել, երբ նախագիծը դրվել էր շրջանառության մի փոքր ավելի վաղ, քան Վենետիկի հանձնաժողովի կարծիքն էր հրապարակվել։ Ընդհանուր առմամբ պետք է արձանագրենք հետևյալը, որ շատ հարցեր, որոնք տրված էին հանձնաժողովի կողմից, ստացել են դրական պատասխան, ընդ որում Վենետիկի հանձնաժողովը տալիս է խորհրդատվական բնույթ ունցեող փաստաթուղթ, որը չափազանց կարևոր է մասնագիտական հանրությանն, օրենսդիր մարմինների համար իրենց դիրքորոշումն արտահայտելու համար։ Կան որոշակի նյուանսներ, որոնք ավելի ընկալելի և հասկանալի են ներպետական կոնտեքստում, քան միջազգային կոնտեքստում»,-ասաց Վլադիմիր Վարդանյանը։

Դիտարկմանը, որ ԵԽ գլխավոր քարտուղարը նշել է, որ չեն պահպանել Վենետիկի հանձնաժողովի դիրքորոշումը, Վլադիմիր Վարդանյանն ասաց՝ նշել է, որ որոշ պարագայում չի պահպանվել այս կամ այն դրույթը, որը վերաբերում է անցումային շրջանի հետ. «Սա խտրական մոտեցում կդրսևորեր անձանց միջև, ում պաշտոնավարումը դադարում է հիմա և նրանց միջև, ում պաշտոնավարումը դադարելու է համապատասխան ամսաթվով»,-ասաց Վլադիմիր Վարդանյանը։

Հարցին՝ նախագիծը ՍԴ ուղարկվելու է, թե ոչ, Վլադիմիր Վարդանյանն ասաց, որ այդ հարցը քննարկվելու է հիմա ԱԺ կանոնակարգ օրենքով նախատեսված կարգով. «Մոտեցումը հետևյալն է մնում, որ մեզանից որևիցե մեկը չի կարող դատավոր լինել։ Հաշվի առնելով այս ամենը՝ իհարկե որոշակի դիտարկումներ և կարծիքներ կհնչեն, կլսեք այդ ամենը»,-ասաց պատգամավորը։

Աղբյուր` Փաստինֆո