Փաստ ինֆո

Ինչ անում ենք, ժողովրդի համար ենք անում

Այն, ինչ անում է ներկա իշխանությունը, բացառապես ժողովրդի համար, ժողովրդի շահերից ելնելով է անում: Եթե ձեզ թվում է, թե քպական պաշտոնյաներին տրվող առասպելական պարգևավճարները այդ պաշտոնյաների բարեկեցության համար են սոսկ, չարաչար սխալվում եք, դա բացառապես արվում է ժողովրդի համար:

Ժողովուրդը պիտի հասկանա և հասկանում է, որ նոր իշխանության պաշտոնյաները և ԱԺ պատգամավորները շքեղ մեքենաներ և բնակարաններ պիտի ունենան, որ աչքները այս ու այն կողմ չլինի, հետո՝ իմիջ կա, բան կա, ի վերջո, ժողովուրդ են ներկայացնում:

Կամ՝ միթե՞ ժողովրդի համար չէին Հայաստանի գյուղերն ընկել մարտի սկզբին իշխանությունները և Սահմանադրական փոփոխությունների հանրաքվեին «Այո» ասելու հանրահավաքներ ու հանդիպումներ կազմակերպում՝ առանց դիմակ ու առանց սոցիալական հեռավորություն պահպանելու էլ նախավարակը տարածում, թեպետ աշխարհով մեկ արդեն թևածում էր այսպես կոչված թագավարակը: Մեր իշխանությունը գիտեր, ամիսներ առաջ գիտեր վիրուսի, դրա տարածման արագության և դրա կանխարգելման անհրաժեշտության մասին, բայց ուղղակի անտեսեց: Եվ գիտե՞ք, ինչու՝ բացառապես ժողովրդահաճո արարք էր դա, քանի որ ժողովուրդն էր ասել՝ այս ՍԴ-ն անգործության է մատնված, ճգնաժամի մեջ է, պիտի արագ փոխել և որ հանրաքվեն ավելի կարևոր է իր համար, քան՝ինչ-որ նոր գրիպի վիրուս:

Դրա համար էր նաև, որ ժողովրդին այդ շրջանում վարչապետը դուխ տվեց, թե բա՝ «կորոնավիրուսն ու՞մ շունն է, որ չհաղթահարենք, պինցետով կբռնենք և օղիով կմշակենք» իսկ առողջապահության թիվ 1 պատասխանատուն ձեռքը թափ տալով ասաց՝ վախենալ պետք չէ, գրիպի պես վիրուս է, դիմակ էլ պետք չէ կրել, ուղղակի պետք է հնարավորինս հաճախ ձեռքերը լվանալ:

Մեկ էլ 180 աստիճանով իշխանությունների տեսակետը փոխվեց. Դա պատահեց այն ժամանակ, երբ ԱՀԿ-ն համավարակ հայտարարեց և պանդեմիայի դեմ պայքարի համար պետություններին սկսեցին լուրջ գումարներ, օժանդակություններ տրվել համավարակի դեմ պայքարելու համար: Այ, դա ուրիշ բան է, այ, այստեղ մեր իշխանությունը հանրաքվեն ուղարկեց գրողի ծոցը: Եվ դա արեց՝ բացառապես ժողովրդի շահերից ելնելով: Միանգամից արտակարգ դրություն մտցվեց, թեպետ շատ տարերային մոտեցումներ եղան. Ասենք, կրթամշակութային հաստատությունները փակվեցին, բայց՝ ասենք, սրճարան-ռեստորանները բաց էին և կրթամշակութային կոնտինգենտը սրճարաններում էին հանդիպում և գրկախառնվում, տրանսպորտը չէր աշխատում, բայց սուպերմարկետներն աշխատում էին, իսկ այ, մոլերը՝ ոչ: Այս բոլար անտրամաբանական քայլերը նույնպես ժողովրդի համար արվեց՝ ժողովրդի մի հոծ զանգվածի դարձնելով կորոնավարակակիրներ:

Ինչ չենք անում, ժողովրդի շահերից ելնելով չենք անում

Պանդեմիայի դեմ պայքարի թավշյա շրջանը շատ հետաքրքիր փաստեր է տալիս, որոնք անվիճելիորեն ժողովրդի համար են արվել: Ասենք, երբ վարակակիր, ծանր վիճակում գտնվող մարդուն տուն են ուղարկել, թե բա՝ թեստ չունենք, բուժհիմնարկներում ազատ տեղեր չունենք, ժողովրդի շահերից էր բխում, քանի որ ինչպե՞ս կարելի էր մահվան եզրին կանգնած, կյանքի ու մահու դեմ պայքարող կորոնավարակակիրներին «Նաիրի» բուժկենտրոն ուղարկել, կամ՝ «համալսարանական հիվանդանոց», որոնք ի սկզբանե կազմ-պատրաստ են եղել հիվանդներ ընդունելու համար: Սա էլ արվել է ժողովրդի համար, հո՞ չէին թողնելու իրենց քպական վերահսկողությունից դուրս գեթ մեկ հիվանդ բուժվեր, թող մեռնեն, բայց այն տարածքներում, որ Թորոսյանն է սահմանել:

Այն, ինչ այս օրերին անում է երկրի վարչապետը, ուղղակի հիսուսաբար ժողովրդին դեղուդարման անելու պես բան է: Երկրի վարչապետն իր հազար ու մի գործը, պետության բոլոր խնդիրները թողած՝ ընկած փողոց առ փողոց, բեսետկա առ բեսետկա մեկ-մեկ դիմակ է բաժանում մարդկանց: Մի տեսակ սովյալներին հաց բաժանելու պես: Դա միայն ու միայն իր ժողովրդի համար է անում: Կա՞ մեկը, որ կարող է մտածել, թե նա այդ կերպ իր փիա՞րն է անում, կամ, կարո՞ղ է մտածում եք, թե՝ դիմակի բիզնես ունի: Ոչ, պարզապես ժողովրդի համար վարչապետի տված դիմակն ուրիշ է, էդ դիմակի միջով ոչ մի բացիլ չի անցնի: Բառի բուն իմաստով: Սա կարո՞ղ է չգնահատի ժողովուրդը:

Դե, բնականաբար, վերջին քաղաքական գործընթացները նույնպես ժողովրդի համար արվեց:

Եվ ընդհանրապես, ա՛յ ժողովուրդ, էս ի՞նչ քննարկումներ եք լեգիտիմ իշխանության հետ տեղ-տեղ ծավալում: Տվե՞լ ես քվեդ՝ թեպետ տվածդ էլ մի բան չէր՝ 40 տոկոսի 70 տոկոսը, որ էսօր ամեն պահ ընդդիմությունը վիճարկում է, թե ՝ կեսից քչի 70 տոկոսը ի՜նչ է որ:

Մեծ հաշվով ճիշտ են, դրա համար էլ՝ ինչ արել ենք, լավ ենք արել՝ ինքնաթիռից ու զրահապատ մեքենաներից մինչև ծխախոտի, ադամանդի, ոսկու բիզնես: Հո ձեր հերվա քվեի հույսի՞ն չենք, մանավանդ, ամեն օր հեղափոխվում եք: Ընտրել եք, պիտի քաշեք, թեկուզ կյանքի գնով: Էս է:

Իսկ եթե հեղափոխվում եք, ուրեմն, մեր հույսը նորից ՍԴ-ն է, մեր ուզած, մեր սրտի դատավորներով ձևավորված ՍԴ-ն: Էս էլ ձեզ համար ենք անում, ինչպես գույքահարկի բարձրացումը, ինչպես բոլորիդ հետևելու, լսելու, տեղորոշելու հնարավորությունը… Որ ոչ մի ձուկ և ոչ մի մուկ չթպրտա: Ոչ մի կողմում:

Հա, մոռացա, ուժայինների փոփոխությունն էլ ձեզ համար արեցինք՝ ոստիկանություն, ԱԱԾ, բոլորը ձեր անվտանգության համար էր: Տեսա՞ք՝ ԲՀԿ-ին ոնց էին ոստիկանները բռնոտում, դա էլ ձեզ համար էր, որ ավելի լավ հայհոյեք համակարգչի առջև նստած:

Արդյունքում, ինչպես շատ լավ նկատեց այսօր հին գվարդիայից մեկը՝ ԱԺ պատգամավոր Իգիթյանը՝ խորհրդարանում ՍԴ-ին վերաբերող հարցի քննարկման ժամանակ, կունենանք միասեռ ՍԴ: Քանի որ էսօր արդեն իսկ ԱԺ-ն միասեռ է, կառավարությունը՝ միասեռ է, մնում է ՍԴ-ն, մեկ էլ՝ չորրորդ իշխանությունը: Դե սրանց մեջ էլ թպրտացողներն ընդհանրապես դաշտից դուրս կգան:

Հեղինակ՝ Արթուր Գահնապետյան

Աղբյուր` Փաստինֆո