Փաստ ինֆո

Մայրաքաղաքում ախտահանման աշխատանքները համակարգված չեն իրականացվում. Չկա սահմանված հստակ ժամանակացույց՝ ինչ պարբերականությամբ պետք է ախտահանվեն, օրինակ, մայրաքաղաքի կանգառները, բակային խաղահրապարակները։ Ավելին՝ քայլեր են ձեռնարկում երթուղայիններում ապահովելու պարետի սահմանած սոցիալական հեռավորության պահանջը։

Այսպես՝ Փաստինֆոն օրեր առաջ հարցում էր ուղարկել Երևան քաղաքապետարան պարզելու համար՝ 2020 թվականի մարտի 16-ից հունիսի 14- ն ընկած ժամանակահատվածում քանի անգամ են ախտահանվել մայրաքաղաքի կանգառներն ու քաղաքային տրանսպորտի միջոցները, ո՞վ է իրականացնում ախտահանման աշխատանքներն ու ինչքան գումար է ծախսվում դրանց իրականացման վրա, ի՞նչ քայլեր են ձեռնարկվում հանրային տրանսպորտի միջոցներում, մասնավորապես՝ երթուղայիններում սոցիալական հեռավորություն պահպանելու պարետի սահմանած որոշումն ապահովելու ուղղությամբ և ախտահանվո՞ւմ են արդյոք մայրաքաղաքի բակային տարածքներում գտնվող խաղասրահները, եթե այո, ապա ո՞ր ընկերության կողմից և ինչ հաճախականությամբ։

Ի պատասխան մեր հարցմանը, Երևանի քաղաքապետարանից ստանում ենք ընդհանրական մի պատասխան, առանց հստակ տվյալների այն մասին, թե որքա՞ն գումար է բյուջեից ծախսվում՝ առհասարակ քաղաքի տրանսպորտի, կանգառներիում բնակելի բազմահարկ շենքերի շքամուտքերի ախտահամնման աշխատանքների իրականացման համար։ Մայրաքաղաքաների բակային տարածքներում գտնվող խաղահրապարակները, ըստ մեզ տրամադրված պաշտոնական տվյալների, ամենայն հավանականությամբ բացառապես չեն ախտահանվում, այդ մասին մեր հնչեցրած հարցման պաշտոնական պատասխանի մեջ որևէ անդրադարձ չկա։

Երևանի քաղաքապետարանին ուղղված մեր հարցման հիմանական նպատակն էր պարզել՝ ինչո՞վ է պայմանավորված մայրաքաղաքում համավարակի տարածման աննախադեպ և անվերահսկելի թվացող ծավալներն, այն պարագայում, երբ արտաքին տվյալներով, մայրաքաղաքի բնակիչները համատարած կերպով պաշտպանում են պարետատան կողմից սահմանված հակահամաճարակային կանոնների պատշաճ կիրառումը՝ ամենուրեք և միշտ կրելով դիմակներ, ախտահանելով ձեռքերը և փորձելով պահպանել սոցիալական հեռավորությունը։

Քաղապապետարանին ուղղված մեր հարցման պաշտոնական պատասխանը հրապարակում ենք ստորև՝ առանց խմբագրման. «Ի պատասխան Երևանի Քաղաքապետարանին ուղղված ձեր հարցմանը, տեղեկացնում ենք, որ համավարակով պայմանավորված մայրաքաղաքի կանգառասրահների և քաղաքային տրանսպորտի ախտահանման աշխատանքները ամենօրյա են: Կանգառների դեպքում գործընթացն իրականացվում է ՀՀ ԱԻՆ և Երևանի քաղաքապետարանի համատեղ միջոցներով: Աշխատանքների վերաբերյալ առանձնացված թվային տվյալներ նշելն անհնար է, քանի որ գործընթացը հաճախ միաժամանակ ու տարաբնույթ է, հաճախ՝ մեկը մյուսին փոխլրացնող: Ախտահանումը հասարակական տրանսպորտում կազմակերպվում է ըստ օրվա ընթացքում երթուղիներ դուրս եկած շարժակազմերի քանակի՝ նախօրոք սահմանված ժամանակացույցով: Ինչ վերաբերում է սոցիալական հեռավորություն պահպանելուն, ապա խնդիրը վերաբերում է միայն էլեկտրատրանսպորտին, մասնավորապես՝ տրոլեյբուսներին, իսկ մետրոպոլիտենի վագոններում առկա ուղևորների թիվը չպետք է գերազանցի 70-ը: Տրանսպորտի մյուս տեսակներում, այդ թվում նաև երթուղայիններում, խնդիր է դրված բացառել կանգնած երթևեկող ուղևորների տեղափոխումը: Հասարակական տրանսպորտում պարետատան ցուցումների պահպանմանը հետևում են ՀՀ ոստիկանության ստորաբաժանումների և ՀՀ քաղաքաշինության, տեխնիկական և հրդեհային անվտանգության տեսչական մարմնի աշխատակիցները: Խաղահրապարակների ախտահանման աշխատանքներն էլ կազմակերպվում են շքամուտքերի ախտահանման միջոցառումների համատեքստում:

Տեղեկացնենք, որ Երևանի քաղաքապետարանից մեզ տրամադրված պաշտոնական տվյալների և իրականացվող աշխատանքների պրակտիկ կիրառման համամասնությունը հասկանալու համար, Փաստինֆո լրատվական գործակալությունը զրուցել է մայրաքաղաքի բնակիչների հետ՝ հետաքրքվելով՝ արդյո՞ք գոհացուցիչ են համարում կորոնավիրուսային վարակի պայմաններում Երևան քաղաքի Կենտրոն թաղամասում իրականացվող ախտահման աշխատանքները։ Պարզվեց մեր համաքաղաքացիները անտեղյակ են ախտահանման աշխատանքներից։

Մանրամասները՝ տեսանյութում։

Հեղինակ՝ Նվարդ Մանվելյան

Աղբյուր` Փաստինֆո