Փաստ ինֆո

Երբ նայում ենք՝ Ազգային ժողովն ինչ օրենքներ է ընդունում, տեսնում ենք, որ տնտեսությանն աջակցող օրենքների պակասություն կա։ «Փաստինֆո»-ի հետ զրույցում այս մասին ասաց Հայաստանի գործատուների միության նախագահ Գագիկ Մակարյանը՝ անդրադառնալով «Բանկային գաղտնիքի մասին» օրինագծին։

Նշենք, որ Սահմանադրական դատարանը «Բանկային գաղտնիքի մասին» օրինագիծը ճանաչել է հակասահմանադրական։ Այս հարցով ՍԴ դիմել էր ՀՀ նախագահ Արմեն Սարգսյանը։

Գագիկ Մակարյանը նկատեց՝ գործարար միջավայրը պետք է առողջացնել ու լավացնել, ինչն իրենից ենթադրում է հարկային, աշխատանքային օրենսգրքերում փոփոխություններ, ինչպես նաև մի շարք այլ օրենքների վերանայում. «ԱԺ-ն իր կարողությունները ծախսում է այլ ուղղություններով, որոնցից մեկը նմանատիպ օրենքներն են։ Փայտը ճկելու չափ կա, եթե շատ ես ճկում, կոտրվում է։ Եթե ուզում են միանգամից հասնել մի կետի, որ գաղտնիքին ու մյուս բաներին տիրապետեն, ամեն ինչ անմիջապես թափանցիկ դառնա, դա փայտը վատ ճկելու տեսանկյունից է դիտվում։ Աստիճանաբար պետք է անել այդ ամենը, որովհետև հասարակությունը, բիզնեսը պետք է ընտելանա ու հասկանա, որ արդեն այդ ձևով պետք է առաջնորդվի։ Գուցե հարկավոր է թույլ տալ, որ իրենք իրենցով ավելի թափանցիկ դառնան։ Ով ասաց, որ բոլորը ձգտում են մնալ չգիտեմ ինչ տեսակ ու անպայման նրանց գլխներին մուրճով պետք է տանք, բացահայտենք ու պարզենք»,-ասաց Գագիկ Մակարյանը։

Կորոնավիրուսային համավարակով պայմանավորված պակասում են նաև օտարերկրյա ներդրումները։ Տնտեսագետը կարծում է, որ դրանք շարունակելու են նվազել, քանի որ յուրաքանչյուր երկիր ներդրումները հենց իր երկրի ներսում է պահելու. «Հիմա տարբեր երկրներ շահագրգռող բաներ կընդունեն, որպեսզի ներդրողներն այդ երկրում մնան։ Իսկ մեր տեղական ներդրողներին պետք չէ հուշտ անել, անընդհատ քշել, վախեցնել ու մուրճը գլխներին պահել։ Հարկավոր է մի քիչ թուլացնել ռեժիմները»,-ընդգծեց Գագիկ Մակարյանը։

Վերջինս ընդգծեց՝ մեկ ամսից 40 օր կարող է տևել, որ կոռուպցիան վերանա, մինչդեռ տարիներ է տևելու, որ ստվերը վերանա, քանի որ ստվերի պատճառները շատ ավելի խորն են.

«Ստվերը ոչ միայն կոռուպցիայով է պայմանավորված, այլև անհավասար ստուգումներով, անհավասար մրցակցային պայմաններով, եկամտաբերության ցածր մակարդակով։ Պետությունն ուզում է՝ բոլորը միանգամից թափանցիկ սկսեն աշխատել և դուրս գան ստվերից, բայց դրանից հետո այդ ընկերությունների կեսը փակվում է, քանի որ իրենց եկամուտները չեն բավականացնում։ Ենթադրենք հազարավոր մարդիկ դառնում են գործազուրկ, դա լա՞վ է, թե՞ ավելի լավ է՝ մի քիչ մեր աչքերը փակենք, ստվերը թող մի քիչ մնա, որովհետև այդ ընկերությունները գոնե զբաղվածությունն իրենց վրա են կրում, չեն բերում ու այդ պրոբլեմը գցում պետության վրա»,-ասաց Գագիկ Մակարյանը՝ հավելելով, որ այս բոլոր հաշվարկները պետք է բազմակողմանի ներկայացվեն վարչապետին և նրան պետք է որոշակիորեն հետ քաշել կտրուկ քայլերի սկզբունքայնությունից. «Նա պետք է աստիճանական մոտեցմամբ գնա։ Փայտ ճկելը պետք է չափ ունենա, ինչպես նաև պետք է հասկանալ՝ ում ես ճկում և ում հետ գործ ունես»,-հավելեց տնտեսագետը։

Հեղինակ՝ Հասմիկ Կոշկարյան

Աղբյուր` Փաստինֆո