Փաստ ինֆո

Կորոնավիրուսի դեմ պայքարի հայկական պատմությունը ավելի քան երեք ամսվա պատմություն ունի: ՈՒշագրավն այն է, որ այդ ընթացքում ազգովի տարբեր շրջափուլեր անցանք, որոնք մեծ հաշվով ինքնանպատակ եղան, հաճախ՝ հոնքն ուղղելու տեղ՝ աչքը հանեցինք, հաճախ՝ մի ծայրահեղությունից թռանք մյուսը, բայց՝ անօգուտ: Թագավարակ կոչվող զարհուրելի բացիլը մի տեսակ ծանր ու մեծ մտել է Հայաստան և դուրս գալու մտադրություն չունի: Պարետատան ամենօրյա վիճակագրությունն այդ է փաստում, այդ է վկայում:

Մի կարճ էքսկուրս անելով եթե վերհիշենք մարտի կեսից համավարակի կանխարգելման շրջանակում հայտարարված արտակարգ դրությանը հաջորդող քայլերը, կհիշենք, որ առաջիններից մեկը վերաբերվում էր մարդկանց տեղաշարժի սահմանափակումներին, ապա դրան հաջորդեց բավական զավեշտալի մի օրենքի նախագիծ, որը խորհրդարանական մեծամասնությունն ընդունեց մարտի 30-ին, արտահերթ նիստ հրավիրելով: Խոսքն «Արտակարգ դրության իրավական ռեժիմի մասին» ՀՀ օրենքում լրացումներ կատարելու մասին նախագծին է վերաբերվում, որով առաջարկվում էր օրենքով թույլ տալ իշխանության մարմիններին հեռախոսազանգի տվյալների օգտագործմամբ իմանալ անձի տեղը, թե ո՞ւմ է նա զանգել՝ պարզելով հեռախոսահամարները, զանգի սկիզբը և ավարտը։ Սա, ըստ իշխանության, նպատակ ուներ հավաքագրել վարակված անձի և նրա շփումների շրջանակի վերաբերյալ օպերատիվ տեղեկատվություն և այդ տեղորոշում կոչվող ակցիան, իբր, ավարտվելու էր արտակագ դրության ավարտմամբ։

Անցել է երեք ամիս՝ հարց տանք հիշյալ օրենքն այդքան կարևորող իշխանություններին՝ տեղորոշմամբ քանի՞ կորոնավարակակիր է հայտնաբերվել այս ընթացքում, քանի՞ հիվանդ է բուժվել, քանիսի՞ն է հնարավոր եղել մեկուսացնել: Ընդհանրապես, վարակակիրներին հայտնաբերելու համատեքստում ի՞նչ ՕԳԳ ունեցավ այս օրենքի ընդունումը: Ի վերջո, մարդու հեռախոսազանգի տվյալներին մատչելություն ունենալը ի՞նչ տվեց իշխանությանը:

Իրականում՝ պարզ է, որ այն ոչինչ չի տվել, քանզի պարզելու համար, թե վարակակրի հետ շփվածը վարակվել է, թե՝ ոչ, պիտի թեստավորել վերջինիս, մինչդեռ ոչ միայն այսօր, այլև ի սկզբանե մեզանում չի գործել որևէ կոնտակտավորի թեստավորման միջոցով հայտնաբերելու, ապա նաև՝ մեկուսացնելու մեթոդը: Էլ չենք խոսում ինքնամեկուսացման մեջ գտնվողներին որոշակի դրամական փոխհատուցման տրամադրման մասին, որը համավարակի կանխմանն ուղղված՝ ԱՀԿ աջակցության շրջանակում է:

Մինչդեռ, այլ երկրների դրական փորձը վկայում է, որ հենց թեստավորմամբ վարակակրին հայտնաբերելու, նրան մեկուսացնելու, նաև՝ ինքնամեկուսացման միջոցն է այս համավարակի կանխման ամենաարդյունավետ եղանակը: Ի դեպ, ըստ ԱՀԿ ցուցումների՝ կորոնավիրուսի կանխման հիմնական միջոցը հենց մեկուսացումն ու ինքնամեկուսացումն է, որի շնորհիվ մարդկանց շփումներն էլ նվազում են, սոցիալական հեռավորությունն էլ պահպանվում է:

ՀՀ իշխանությունների՝ համավարակի կանխմանն ուղղված քայլերն ուղղակի բրոունյան քաոսային շարժում է հիշեցնում, որի տրամաբանությունը տրամաբանության բացակայությունն է:

Ասացեք, խնդրեմ, ո՞նց կարող է մի երկրում արգելվել մոլերի գործունեությունը, երբ գործում են հսկա սուպերմարկետները, սրճարաններն ու ռեստորանները: Ո՞նց կարող են վերջիններս գործել, սակայն տոտալ փակ լինեն թանգարաններն ու համերգասրահները, թատրոններն ու այլ մշակութային օջախներ: Մի տեսակ տպավորությունն այն է, թե ՀՀ իշխանությունն այս ողջ ընթացքում ոչ թե՝ կորոնավիրուսը կանխելու դեմ է պայքարել, այլ կոնկրետ ոլորտների, անձանց…

Էլ չենք խոսում քաղաքացուն ուղղված՝ սոցիալական հեռավորություն պահելու խիստ հրահանգի և տրանսպորտային ցանցի՝ ավտոբուսներ, երթուղայիններ գործարկման մասին, ուր ուղղակի անհնար է սոցհեռավորության կիրառումը: Եվ կամ՝ հավաքները, մեկ տասնյակից պակաս մարդկանց կուտակումներն արգելված են, մինչդեռ՝ ոստիկանական ուժերի կիպ-կպած շղթան նորմալ է դիտարկվում, էլ չասած՝ դիմակ չունեցող մարդկանց վրա ոստիկանների՝ խմբակային հարձակման, քաղաքացու նկատմամբ սոցիալական հեռավորություն չպահելու, ավելին, բռնի ուժ գործադրելու և բերման ենթարկելու փաստերի մասին:

Ի դեպ, անզեն աչքով էլ տեսանելի է, որ կորոնավիրուսի դեմ պայքարը նույնպես մեր իշխանություններն իրականացնում են սևերի և սպիտակների բաժանման համատեքստում:

Ինչ վերաբերվում է այս շրջանակում իրականացվող միջոցառումներին՝ վարչապետի կողմից շրջայցեր սննդի օբյեկտներ կամ հիվանդանոցներ, դիմակների բաժանում և այլն, բոլորը ցուցադրանք են պարունակում և ալիբի ապահովելու նպատակ ունեն՝ սկսած աշխարհահռչակ երաժշտի և Փաշինյանի՝ առ ժողովուրդն ուղղված մեղադրանքը, թե՝ օրենք չհարգող, կարգուկանոնը խախտող ժողովուրդ ունենք, ավարտած՝ վարչապետի՝ դիմակ բաժանելն ու դիմակ կրելու համար ժողովրդի ներկայացուցիչներին ուղղված հատ-հատ շնորհակալությունները: Շնորհակալություն, որ դիմակ եք կրում:

Մենք տապալել ենք համավարակի դեմ պայքարը նախևառաջ մեր իշխանությունների թեթևամտության և առկա միջոցներն ու հնարավորություններն արդյունավետ ու ժամանակին չօգտագործելու պատճառով:

Որպես արդյունք՝ իշխանության մեղավորության կանխավարկածն ակնհայտ է:

Հեղինակ՝ Աննա Աթանեսյան

Աղբյուր` Փաստինֆո