Փաստ ինֆո

Եվրոպայի խորհրդի խորհրդարանական վեհաժողովում իմ քաղաքական խումբը, որի անդամ ենք ես և իմ գործընկեր Միքայել Մելքումյանն անդամ ենք, բավականին կոշտ հայտարարություն է տարածել իմ հանդեպ սկսված այս գործընթացների հետ կապված։ Այս մասին այսօր լրագրողների հետ զրույցի ժամանակ ասաց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը։

Վերջինս նշեց, որ իրեն զանգահարել են եվրոպական բավականին հայտնի իրավապաշտպաններ, քաղաքական գործիչներ, որոնք առաջիկայում հանդես կգան հրապարակումներով։ Նաիրա Զոհրաբյանը նշեց, որ նրանք ուշիուշով հետևելու են, թե՛ ԲՀԿ-ի, թե՛ իր հանդեպ սկսված այս գործընթացներին. «Ես սա չեմ համարում դրսից տղա բերել։ Եվրոպացի իմ գործընկերները, այդ թվում ԵՄ որոշ երկրների խորհրդարանների շատ ազդեցիկ անձինք, ընդհուպ փոխնախագահների մակարդակով ցանկանում էին այս օրերին հրապարակումներով հանդես գալ, սակայն ինքս խնդրել եմ այս պահին ձեռնպահ մնալ։ Կարծում եմ, որ այն մարդիկ, որոնք փորձում են քաղաքական ընդդիմախոսներին նման տարբերակներով և նման ճանապարհներով, պետք է կանգ առնեն։ Սա երկիրը փակուղի տանելու ճանապարհ է»,-ասաց Նաիրա Զոհրաբյանը՝ ընդգծելով, որ իշխանությունը պետք է պատերազմ հայտարարի ոչ թե մտահոգություն հայտնողների, այլ կորոնավիրուսի դեմ։
Հարցին՝ պատրաստվում են համագործակցել ՀՀԿ-ի հետ, պատգամավորը ընդգծեց՝ բոլոր այն քաղաքական ուժերը, որոնք մերժված են ժողովրդի կողմից, մերժված են նաև իրենց կողմից. «Եթե կարծում եք նույն հարցը տարբեր սոուսներով՝ մանանեխով, առանց մանանեխի, տարբեր անկյուններով տալով՝ ստանալու եք այն պատասխանը, որ ճտացնեք վերնագրեր, չեք ստանալու Ձեր երանելի նախադասությունը»,-ասաց Նաիրա Զոհրաբյանը։

Աղբյուր` Փաստինֆո