Փաստ ինֆո

Ցանկացած վիրավորական արտահայտություն դատավորի նկատմամբ՝ անթույլատրելի է։ Այս մասին «Փաստինֆո»-ի հետ զրույցում ասաց իրավաբանական գիտությունների թեկնածու, ԲԴԽ անդամ Գրիգոր Բեքմեզյանը՝ անդրադառնալով Վերաքննիչ քրեական դատարանի դատավոր Արսեն Նիկողոսյանի նկատմամբ սոցցանցում իրականացվող հակաքարոզչական արշավին։

Բեքմեզյանը տեղեկացրեց, որ երեկ հեռախոսազրույց է ունեցել դատավոր Արսեն Նիկողոսյանի հետ և այսօր դատավոր Արսեն Նիկողոսյանին ԲԴԽ են հրավիրել՝ քննարկելու ստեղված իրավիճակը։ Բեքմեզյանի խոսքով՝ ԲԴԽ-ն անհրաժեշտության դեպքում քայլեր կձեռնարկի։

«Մենք կհանդիպենք պարոն Նիկողոսյանի հետ, կքննարկենք և, եթե անհրաժեշտություն լինի, եթե գտնենք, որ կա կարիք, դատավորը համաձայնի որոշակի գործողությունների, համապատասխան քայլեր կձեռնարկենք»,- ասաց Բեքմեզյանը՝ չմանրամասնելով, թե ինչ քայլերի մասին է խոսքը, սակայն ընդգծեց, որ հեռախոսազրույց է ունեցել այդ մտահոգիչ հարցի շուրջ և ԲԴԽ անդամները ևս տեղեկացված են կատարվածի մասին, դատավորի հետ հանդիպումից հետո կլինի գործողությունների որոշակի պլան։

Ինչ վերաբերում է Հանրային խորհրդի նախագահ Ստյոպա Սաֆարյանի հրապարակումներին, Բեքմեզյանն ասաց, որ այդ հարցը ևս կքննարկվի պարոն Նիկողոսյանի հետ։

«Ես գիտեմ, որ պարոն Սաֆարյանը երկու հայտարարություն է արել, որոնցից մեկով նկարի հրապարակման տեքստն է, իսկ երկրորդ հայտարարությամբ, կարծես թե նա իր սխալն ընդունեց և մեկ այլ հայտարարություն արեց, որով ներողություն էր խնդրում նկարը հրապարակելու համար։ Եթե ես չեմ սխալվում ։ Տեսել եմ այդ հայտարարությունը և այդպիսի տպավորություն եմ ստացել, բայց ամեն դեպքում այդ հարցը կքննարկենք պարոն Նիկողոսյանի հետ»,- նշեց Բեքմեզյանը։

Դիտարկմանը, որ ոչ իշխանահաճո որոշումներից հետո թիրախավորվում են դատավորները և դատարանները, Բեքմեզյանն արձագանքեց՝ նշելով, որ պետք է օբյեկտիվ նայել այս հարցին։

«Ցավոք սրտի մենք հիմա այնպիսի իրավիճակում ենք գտնվում, որ դատավորի ցանկացած որոշման դեպքում, հակառակ կողմի կողմնակիցներից սկսվում է նմանատիպ վերաբերմունք, նմանատիպ արտահայտություններ, գործողություններ, որի օրինակը բազմիցս ունեցել են։ Դա անթույլատրելի է բոլոր դեպքերում՝ անկախ նրանից, թե դատավորն ինչ որոշում է կայացրել»,- ասաց Բեքմեզյանը։

Ըստ Բեքմեզյանի՝ պետք է քայլեր ձեռնարկել նման իրավիճակները բացառելու համար։

«Շատ դժվար է, իհարկե, բայց պետք է կարողանանք հասունանալ այնքան, որ հասկանանք, որ դատավորներին հայհոյելը, նրանց անձնական կյանքի մեջ մտնելը, նրանց վերաբերյալ կարծիքներ գտնելը և հրապարակելը որևէ կերպ չեն կարող ազդել կամ նպաստել արդարադատության իրականացմանը»,- նշեց Բեքմեզյանը։

Հարցին, թե արդյո՞ք նման հայտարարությունները չեն ազդում դատական իշխանության, դատարանների հեղինակության վրա, Բեքմեզյանը պատասխանեց. «Իհարկե ազդում են, ինչը ևս մեկ անգամ ապացուցում է, որ դրանք անթույլատրելի են»։

Հիշեցնենք, որ երեկ՝ հունիսի 18-ին Վերաքննիչ քրեական դատարանը՝ նախագահությամբ դատավոր Արսեն Նիկողոսյանի, բավարարել է ՀՀ երկրորդ նախագահ Ռոբերտ Քոչարյանի խափանման միջոցի վերաբերյալ պաշտպաններ Արամ Վարդևանյանի և Հովհաննես Խուդոյանի բողոքները, իսկ Ռուբեն Սահակյանի վերաքննիչ բողոքը՝ մասնակի։ Վերաքննիչ դատարանը մասնակիորեն բեկանել է Երևանի ընդհանուր իրավասության դատարանի որոշումը։ Դատարանի որոշման համաձայն՝ Ռոբերտ Քոչարյանն ազատ կարձակվի 2 մլրդ ՀՀ դրամի չափով գրավի դիմաց՝ գումարը դատարանի դեպոզիտ հաշվին փոխանցելուց հետո։

Դատական ակտի հրապարակումից հետո դատավոր Արսեն Նիկողոսյանի նկատմամբ սկսվել են որոշակի ճնշումներ։ Սոցիալական ցանցերում օգտատերերից շատերը վիրավորական արտահայտություններ են արել նրա հասցեին։

Բացի այդ՝ Հանրային Խորհրդի նախագահ Ստյոպա Սաֆարյանը ֆեյսբուքյան իր էջում տեղադրել էր Արցախի նախկին ՄԻՊ, իրավապաշտպան Ռուբեն Մելիքյանի և դատավոր Արսեն Նիկողոսյանի լուսանկարը, որտեղ երևում է նաև Ռուբեն Մելիքյանի մանկահասակ որդին։ Սաֆարյանը նշել էր, թե վարչապետ Նիկոլ Փաշինյանը դեռ երկար ժամանակ պետք է հասկանա, թե ինչ էր անում Ռուբեն Մելիքյանը արդարադատության փոխնախարարի ու Արդարադատության ակադեմիայի ռեկտորի պաշտոններում Հրայր Թովմասյանի ու Արփինե Հովհաննիսյանի ղեկավարությամբ, երբ ամեն մի պատահականության դատավոր էին "կրթում" ու դարձնում։ Մինչդեռ՝ Ռուբեն Մելիքյանը, խոսելով դատավոր Արսեն Նիկողոսյանի մասին, ընդգծել է, որ Արսեն Նիկողոսյանը եղել է լավագույն ուսանողներից մեկը։

Հատկանշական է, որ դատավոր Արսեն Նիկողոսյանը այն գիտնական իրավաբաններից, որը մեծ հարգանք ու վարկանիշ ունի փաստաբանների շրջանում, մասնագիտական համայնքում, իսկ նրա նախագահությամբ դատական նիստերը կարելի է համարել օրինակելի։ Նրա վարկանիշը հունիսի 18-ի դրությամբ 56 միավոր է։

Նշենք, որ նախկինում ևս հայտնի քրեական գործերով կայացված դատական ակտերի համար թիրախավորվել են բարձր վարկանիշ ունեցող դատավորներ։ Ամենաբարձր վարկանիշն ունեցող դատավոր Ալեքսանդր Ազարյանի նկատմամբ աննախադեպ ճնշումներն սկսվել են 2018թ օգոստոսին Ռոբերտ Քոչարյանի խափանման միջոցը վերացնելուց հետո. կայացված դատական ակտով արձանագրվել էր, որ ՀՀ երկրորդ նախագահ Ռոբերտ Քոչարյանն ունի գործառութային անձեռնմխելիություն, ինչը չի հաղթահարվել։ Ճնշումների երկրորդ ալիքը սկսվեց, երբ դատարանը՝ դատավոր Ալեքսանդր Ազարյանի նախագահությամբ, բավարարեց Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը՝ նշելով, որ բացակայում է հիմնավոր կասկածը։ Այժմ ԲԴԽ-ն քննարկում է նրան կարգապահական պատասխանատվության ենթարկելու հարցը։ Ճնշումներ են գործադրվել նաեւ դատավոր Դավիթ Գրիգորյանի նկատմամբ, որը 2019 թվականի մայիսի 18-ի որոշմամբ ՀՀ երկրորդ նախագահ Ռոբերտ Քոչարյանի նկատմամբ որպես խափանման միջոց էր ընտրել անձնական երաշխավորությունը։ Այդպիսի միջնորդությամբ դատարանում հանդես էին եկել Արցախի գործող եւ նախկին նախագահները, իսկ մայիսի 20-ին որոշում էր կայացրել նաեւ քրեական գործի վարույթը կասեցնելու եւ ՍԴ դիմելու մասին։ Այս որոշումներից հետո Դավիթ Գրիգորյանի նկատմամբ իրականացվեցին դատավարական գործողություններ ու մեղադրանք առաջադրվեց

ՀՀ քրեական օրենսգրքի 314-րդ հոդվածի 1-ին մասի հատկանիշներով՝ պաշտոնատար անձի կողմից շահադիտական նպատակով կամ անձնական այլ դրդումներով կամ խմբային շահերից ելնելով պաշտոնեական կեղծիք կատարելու համար։ Գործը մեղադրական եզրակացությամբ ուղարկվել է դատարան, սակայն հունիսի 5-ին դատարանը գործի վարույթը կարճել է՝ հանցագործություն դեպքի բացակայության հիմքով։

Հեղինակ՝ Իզաբել Սահակյան

Աղբյուր` Փաստինֆո