Փաստ ինֆո

Դեռ մեկ տարի առաջ էի ասում, որ 300.1 հոդվածն անորոշ է և Վենետիկի հանձնաժողովը փաստորեն ասաց այն, ինչ սպասվում էր։ «Փաստինֆո»-ի հետ զրույցում այս մասին ասաց միջազգային իրավունքի փորձագետ Արա Ղազարյանը՝ անդրադառնալով Վենետիկի հանձնաժողովի՝ ՀՀ ՔՕ 300.1 հոդվածի սահմանադրականությանը համապատասխանության խորհրդատվական կարծիքին։

«Սովորաբար եթե սահմանադրական կարգի տապալման մասին են խոսում, ենթադրվում է, որ կա բռնության տարրը որպես օբյեկտիվ հատկանիշ։ Նախկին՝ 300 հոդվածում միշտ նշվում էր սահմանադրական կարգի տապալում բռնությամբ, իսկ 2009-ի մարտին բռնության տարրը հանվեց, դա նշանակում է ՝ հոդվածը լայնացավ։ Նշանակում է հիմա բռնության տարրը կա՞, թե՞ չկա։ Այնտեղ նշում է Սահմանադրությամբ ամրագրված ինչ-ինչ երաշխիքների խախտումով, բայց միևնույն է պարզ չէ բռնության տարրը կա, թե ոչ։ Վենետիկի հանձնաժողովին նաև դա է մի փոքր զարմացրել, բայց բոլոր դեպքերում հաշվի առնենք, որ այդ հոդվածը երբեք չի էլ կիրառվել։ Դատարանների մեկնաբանություն չկա, դոկտորինալ մեկնաբանություն չկա, բնականաբար ընդհանուր առմամբ իրավական անորոշություն կա այս հոդվածի հետ կապված», -ասաց Արա Ղազարյանը։

Հարցին՝ որն է լինելու Սահմանադրական դատարանի հաջորդ քայլն այն դեպքում, երբ արդեն ստացել է ՄԻԵԴ-ի և Վենետիկի հանձնաժողովի խորհրդատվական կարծիքները, Արա Ղազարյանը նկատեց՝ ՍԴ-ի առջև կա չավարտված վարույթ, և եթե համարի, որ սպառված են խորհրդատվական կարծիքները, ապա պետք է վերսկսի վարույթը. «Երկուսն էլ խորհրդատվական կարծիք են և պարտադիր չէ, որ ՍԴ-ի որոշումն ամբողջությամբ համընկնի խորհրդատվական կարծիքներին։ ՍԴ-ի առջև բարձրացվել էր 300.1 հոդվածի սահմանադրականության հարցն իրավական որոշակիության տեսանկյունից և պետք է որոշում կայացնի»,-նշեց Արա Ղազարյանը։

Վերջինս հավելեց՝ ըստ էության ՍԴ-ի որոշումը կարող է ԱԺ-ի համար հիմք լինել, որպեսզի ԱԺ-ն վերանայի օրենքը, բայց այնպես, ինչպես նշում է ՍԴ-ն։

Հարցին՝ արդյոք այս երկու խորհրդատվական կարծիքը հիմք տալիս է ենթադրել, որ հոդվածը հակասահմանադրական է, Արա Ղազարյանն ասաց. «Իհարկե, չէ՞ որ սրանք շատ հեղինակավոր մարմինների կարծիքներ են։ Իրավաբանորեն սա պարտադրող չէ, բայց բոլորը հասկանում են, որ պետք է հաշվի առնել այս կարծիքները։ Եթե հաշվի չառնվեն, ապա իրավական գործընթացի վերջում, եթե ապագայում եվրոպական դատարանում դիմում հայտնվի ու վճիռ կայացվի, ապա այն չի կարող տարբերվել եվրոպական դատարանի նախկինում հայտնած կարծիքից կամ Վենետիկի հանձնաժողովի կարծիքից»,-ասաց Արա Ղազարյանը՝ ընդգծելով, որ իրավական գործընթացով գիտեն՝ որոշումը չի կարող տարբերվել Վենետիկի հանձնաժողովի որոշումից։

Հեղինակ՝ Հասմիկ Կոշկարյան

Աղբյուր` Փաստինֆո