Փաստ ինֆո

«Չի կարող ստացվել այնպես, որ տնտեսվարողների համար բարձրացող սակագինը չունենա իր ազդեցությունը դեպի տնտեսություն: Գազի սակագնի բարձրացումը բերելու է գնաճի: Մեզ համար տնտեսության վճարվող գինը շատ ավելի բարձր է լինելու»,- «Փաստինֆո»-ի հետ զրույցում ասաց «Հայացք» վերլուծական կենտրոնի փորձագետ Լիլիա Ամիրխանյանը:

Ինչպես արդեն տեղեկացրել ենք՝ հուլիսի 1-ից թանականալու է գազի գինը, բայց բնակիչների համար նախատեսված սակագինը չի փոխվի։ Փոխարենը՝ «Գազպրոմ Արմենիան» հայտարարել է, որ հուլիս 1-ից կկրճատի 1000 աշխատատեղ, այսինքն այդքան մարդ կզրկվի աշխատանքից։ Փորձագետն արձանագրեց, որ այստեղ խնդիրը միայն աշխատատեղերի կրճատումը չէ, որը դառնալու է սոցիալական բեռ:

«Խնդիրը միայն հազար աշխատատեղը չէ. նրանք ունեն արդյունավետության այլ ցուցիչներ, որը պետք է ինչ-որ կերպ ապահովի: Եվ այն հանգամանքը, որ սպառողների համար չի բարձրանալու գազի սակագինը չի տալիս մեզ վստահություն, որ խնդիրը փակվել է: Մենք հասկանում ենք, որ սա հարցի լուծում չէ և որոշ ժամանակ անց մենք կանգնելու ենք գազի սակագնի խնդրի օրակարգի առաջ»,- ասաց նա:

Տնտեսական ճգնաժամի ֆոնին սոցիալական խնդիրները նույնպես ավելանում են: Մտահոգիչ է նաև ՊԵԿ փոխնախագահ Արթուր Մանուկյանի հայտարարությունը, ըստ որի 4 ամսվա ընթացքում Հայաստանում 12.000 քաղաքացի կորցրել է աշխատանքը։ Տնտեսագետը վստահ է, կորոնավիրուսի հետևանքով գործազուրկների թիվն ավելին է և պաշտոնական թվերը վերաբերում են միայն գրանցված աշխատողներին:

«Մեր բնակչության մոտ զգալի մաս աշխատել է օրավարձով կամ գրանցված-չգրանցված սկզբունքով: Աշխատողների մի զգալի հատված օրավարձով աշխատողներն են, և որևէ կերպ «չերևացող»: Բայց հաշվի առնելով, որ օրավարձով աշխատողների մեծ մասը առևտրի և ծառայության ոլորտներից են, ապա կարող ենք ասել, որ 12000 թիվն իրականում շատ ավելի մեծ է»:

Տնտեսագետի կարծիքով ճգնաժամերը դուրս են բերում բոլոր այն խնդիրները, որոնք կան իրականում և, որոնք այլ հավասար պայմաններում որևէ կերպ չեն արտացոլվում:

«Այսօր այն սոցիալական խնդիրները և տնտեսական համակարգային խնդիրները որոնց բախվել ենք ճգնաժամի հետևանքով, ցույց են տալիս, որ այդ դրանք եղել են խորության մեջ: Եվ այն երկու տարիների հայտարարված փոփոխությունները եղել են կարճաժամկետ և առաջին էֆֆետ ցույց տվող»:

Աղբյուր` Փաստինֆո