Փաստ ինֆո

«Այդպիսի երևույթը ես բնութագրել եմ որպես հրապարակայնորեն հակադրվել մարդու իրավուքներին: Այսինքն՝ չիմացությունը մի բան է, բայց այստեղ բոլորը հրաշալի տեղյակ են ամեն ինչի մասին ու դա առաջին անգամ չէ, որ այդ անձնավորությունը և ԱԺ-ի պատգամավորները ցուցադրական հակադրվում են մարդու իրավուքների թե տեսությանը, թե պրակտիկային»:

Խոսքը Հանրային խորհրդի նախագահ Ստյոպա Սաֆարյանի ֆեյբուքյան գրառման մասին է, որտեղ հրապարակել է Ռոբերտ Քոչարյանի խափանման միջոցի գործը քննող դատավոր Արսեն Նիկողոսյանի, պաշտպան Ռուբեն Մելիքյանի և նրա երեխայի լուսանկարը՝ վերջիններիս դարձնելով ֆեյսբուքյան մի շարք օգտատերերի հարձակումների թիրախ:

Մարդու իրավունքների առաջին պաշտպան Լարիսա Ալավերդյանը նշեց, որ դա երեխաների իրավունքների մասին կոնվեցիայով նախատեսված խախտում է:

«Նման երևույթը կոնկրետ երեխայի իրավունքի ոտնահարում է»,- «Փաստինֆոյի» հետ զրույցում ասաց Լարիսա Ալավերդյանը:
Մեր այն դիտարկմանը, թե արդյոք Հայաստանում երեխաների իրավունքները գտնվում են ռիսկային ոլորտում, Լարիսա Ալավերդյանը նշեց, որ այն ինչ կատարվում է աշխարհում, մասամբ արտացոլվում և կրկնվում է նաև Հայաստանում:

«Իսկ ընդհանուր առմամբ ես միշտ համարել եմ, որ երեխաների իրավունքների հանդեպ ուշադրությունը և կոնկրետ գործողությունները Հայաստանում չնչին են: Չեն համապատասխանում պահանջվածին»։

Հանրային խորհրդի նախագահի հրապարակմանը անդրադարձել է նաև ՄԻՊ Արման Թաթոյանը՝ երևույթը որակելով արատավոր:

«Մեր երկրում խիստ վտանգավոր չափերի է հասնում մարդու նկատմամբ ուղղված վիրավորանքն ու ատելությունը՝ նրա մասնավոր և ընտանեկան կյանքը թիրախավորելով: Բացարձակ անթույլատրելի է, երբ անօրինական նպատակի համար օգտագործվում են երեխաները: Այս երևույթն ավելի է մեծացնում լարվածությունը, բերում է վտանգավոր հետևանքների և բազմապատկում է վիրավորանքը: Պետք է դադարեցնել, ուղղակի բացառել իրար վիրավորելու, իրար արժանապատվություն նսեմացնելու վտանգավոր սովորությունը՚,- նշված է հայտարարության մեջ:

Հանրային խորհրդի նախագահի ֆեյսբուքյան էջում չեք գտնի հրապարակած լուսանկարը: Այն այսօր արդեն հեռացված է. Սաֆարյանն ավելի ուշ ներողություն է խնդրել իրավապաշտպան Ռուբեն Մելիքյանից և նրա ընտանիքից, նշելով որևէ մտադրություն չի եղել ուշադրություն հրավիրել նկարում առկա երեխայի կամ նրանց ընտանիքների վրա:

Աղբյուր` Փաստինֆո