Փաստ ինֆո

«Բարգավաճ Հայաստան» խմբակցության պատգամավորները հանդիպումներ են ունենում դիվանագիտական կորպուսի ներկայացուցիչների հետ։ Այս մասին լրագրողների հետ զրույցի ժամանակ ասաց «Բարգավաճ Հայաստան» խմբակցության պատգամավոր Իվետա Տոնոյանը։

Նրա խոսքով հանդիումների ընթացքում քննարկվում է երկկողմ ստեղծված իրավիճակը։ Իվետա Տոնոյանն այդ հանդիպումների հետ կապված այլ մանրամասներ չհայտնեց. «Մենք ֆիքսում ենք փաստը, որ տեղի են ունեցել հանդիպումները ոչ միայն Ռուսաստանի, այլև բազմաթիվ այլ դեսպանների հետ։ Երեկ հանդիպումներ են եղել Ղազախստանի և Ռուսաստանի դեսպանների հետ։ Հանդիպումները շարքը շարունակական է լինելու»,-ասաց Իվետա Տոնոյանը։

Պատգամավորը նշեց, որ ԲՀԿ ղեկավար Գագիկ Ծառուկյանի հետ հանդիպումները պարբերական բնույթ ունեն և նրա տրամադրությունը շատ բարձր է։ Իվետա Տոնոյանը նաև նշեց, որ իրենց օրակարգում որևէ բան չի փոխվել. «Երկրում պետք է իրականացվեն արմատական փոփոխություններ, այդ թվում նաև կառավարության 100 տոկոսի փոփոխություն, ներառյալ Նիկոլ Փաշինյանը»,-ասաց պատգամավորը։

Անդրադառնալով ԱԺ փոխխոսնակ Ալեն Սիմոնյանի այն հայտարարությանը, որ ինչ էլ քննարկեն ու ինչպես էլ համախմբվեն, արդյունքում Սերժ Սարգսյան է ծնվելու, Իվետա Տոնոյանն ասաց. «Ցավոք սրտի ծանոթ չեմ նրա հայտարարությանը։ Նախօրեին ինձ համար շատ տարօրինակ էր նաև վարչապետի հայտարարությունը կուսակցությունների հետ կապված, որով հորդորում էր իշխանության ներկայացուցիչներին հանդես գալ օրենսդրական նախաձեռնությամբ, որ եթե այս կամ այն կուսակցությունն այս կամ այն քրեական գործի շրջանակներում ինչ-որ առնչություններ ունի, նրանց գործողությունները դադարեցվեն։ Չէի պատկերացնում, որ մենք այլևս բռնապետության կամ ֆաշիզմի ժամանակաշրջանում ենք ապրում, որ հնարավոր է նման գործընթացներով հանդես գալ կուսակցությունների նկատմամբ կամ կուսակցությունները փակելու նման հրապարակային կոչով հանդես գալ երկրի թիվ մեկ ամբիոնից»,-ասաց Իվետա Տոնոյանը։

Հարցին՝ Գագիկ Ծառուկյանի մանդատն ում է փոխանցվելու, Իվետա Տոնոյանն ասաց, որ նրա մանդատը որևէ մեկին չի փոխանցվելու. «Պարոն Ծառուկյանը շարունակում է լինել ԱԺ պատգամավոր և «Բարգավաճ Հայաստան» խմբակցության ղեկավար»,-ասաց պատգամավորը։

Աղբյուր` Փաստինֆո