Փաստ ինֆո

Բարձրագույն դատական խորհուրդը քի չառաջ մերժեց ԲԴԽ անդամ, դատավոր Մեսրոպ Մակյանի ինքնաբացարկը, որը վերջինս ներկայացրել էր Վերաքննիչ քրեական դատարանի դատավոր Ալեքսանդր Ազարյանին կարգապահական պատասխանատվության միջնորդության գործով։

Նիստին ներկայացել է դատավոր Ալեքսանդր Ազարյանը և նրա ներկայացուցիչ, փաստաբան Տիգրան Աթանեսյանը, ՀՀ արդարադատության նախարար Ռուստամ Բադասյանը։ Նիստի մեկնարկին ԲԴԽ նախագահ Ռուբեն Վարդազարյանը հայտարարեց, որ ԲԴԽ-ն ստացել է ինքնաբացարկի միջնորդություն՝ ԲԴԽ անդամ, Երևանի ընդհանուր իրավասության դատարանի դատավոր Մեսրոպ Մակյանից։ Վերջինս նշեց, որ իր մոտ առաջ են եկել ինքնաբացարկ հայտնելու հիմքեր՝ ընդգծելով, որ փաստաբան Տիգրան Աթանեսյանը հանդիսանում է իր ընկերը, ում հետ սովորել է ԵՃՊՀ Իրավագիտության ֆակուլտետի նույն կորսում, ավելին՝ ներկայումս հանդիսանում է վերջինիս կրտսեր որդու՝ Աշոտ Աթանեսյանի կնքահայրը։ Բացի այդ՝ Տիգրան Աթանեսյանը հանդիսանում է նաև իր ավագ եղբոր որդու հարսանիքի քավորը։

Մակյանը տեղեկացրեց, որ որպես դատավոր նախկինում նշված հիմքով արդեն հայտնել է ինքնաբացարկ։ ՀՀ արդարադատության նախարարը չառարկեց Մակյանի՝ ինքնաբացարկ հայտնելուն, իսկ Տիգրան Աթանեսյանն ասաց, որ իր կարծիքով ինքնաբացարկի հիմքեր չկան։ ԲԴԽ-ն հեռացավ խորհրդակցական սենյակ՝ Մեսրոպ Մակյանի ինքնաբացարկի հարցով որոշում կայացնելու, ապա հայտարարվեց, որ այն մերժել է։

Ավելի վաղ տեղեկացրել ենք, որ Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ է հարուցվել արդարադատության նախարարության կողմից՝ ապրիլին: Մայիսի 22-ին միայն ԲԴԽ-ն հաստատեց, որ ՀՀ արդարադատության նախարարությունից ստացել են միջնորդություն՝ դատավոր Ալեքսանդր Ազարյանին կարգապահական պատասխանատվության ենթարկելու մասին։

Կարգապահական վարույթի հարուցման պատճառը «5-րդ ալիք» ՀԸ սեփականատեր Արմեն Թավադյանի խափանման միջոցի գործով դռնփակ դատական նիստում հնչեցված գնահատականն է:

Արձանագրենք, որ Ալեքսանդր Ազարյանը համարվում է լավագույն դատավորներից մեկը։ Նա երկու տարի շարունակ ճանաչվել է տարվա ամենաբարձր վարկանիշ ունեցող դատավոր, իսկ 2020թ. հունիսի 1-ի դրությամբ՝ նա կրկին ունի ամենաբարձր վարկանիշը՝ 76 միավորով:
Բարձր վարկանիշ ունեցող դատավոր Ալեքսանդր Ազարյանի նկատմամբ աննախադեպ ճնշումներն սկսվել են 2018թ օգոստոսին Ռոբերտ Քոչարյանի խափանման միջոցը վերացնելուց հետո. կայացված դատական ակտով արձանագրվել էր, որ ՀՀ երկրորդ նախագահ Ռոբերտ Քոչարյանն ունի գործառութային անձեռնմխելիություն, ինչը չի հաղթահարվել։ Ճնշումների երկրորդ ալիքը սկսվեց, երբ դատարանը՝ դատավոր Ալեքսանդր Ազարյանի նախագահությամբ, բավարարեց Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը՝ նշելով, որ բացակայում է հիմնավոր կասկածը։

Հեղինակ՝ Իզաբել Սահակյան

Աղբյուր` Փաստինֆո