Փաստ ինֆո

Մինչ այստեղ նստած կառուցողական քննարկում էինք անում, ինչ-որ լրատվամիջոցներ սկսեցին հրապարակել, թե մենք այս կամ այն երկրի դեմ ինչ-որ օրինագիծ ենք ընդունում։ Այս մասին ԱԺ-ում ասաց ՀՀ բարձր տեխնոլոգիական արդյունաբերության նախարար Հակոբ Արշակյանը՝ անդրադառնալով «Տեսալսողական մեդիայի մասին» օրենքի նախագծին։

«Ժողովուրդ ջան այսպիսի տեղեկատվական ցածրորակ ստերն արդեն հասնում են միջպետական մեր հարաբերությունները խաթարելու ուղիղ գործողությունների։ Կոչ եմ անում, որպեսզի դադարեցվեն այդպիսի նյութերը, արարքները։ Նաև մեր անվտանգության մարմիններին ցանկանում եմ կոչ անել, որպեսզի հետևեն և համապատասխան միջոցներ կիրառեն այսպիսի դեպքերում, եթե դրանք միտումնավոր կոնկրետ գծի են հետևում»,-ասաց նախարարը։

Այս խնդրին ԱԺ ամբիոնից անդրադարձավ նաև «Իմ քայլը» խմբակցության պատգամավոր Մխիթար Հայրապետյանը. «Քիչ առաջ ինձ մի լրատվականից նյութ ուղարկեցին, որը վերնագրված էր հետևյալ կերպ. «ԱԺ-ում այս պահին քննարկվում է ռուսական հեռուստաալիքների դեմ օրենքի նախագիծը»։ Ես անունը դեռևս չեմ տա։ Կես ժամ ժամանակ եմ տալիս այդ լրատվամիջոցի շեֆերին, դրանց հետևում կանգնած անձանց էս հակապետական, խայտառակ, դավաճանական վարքագիծը փոխելու համար։ Կա՛մ շատ արագ վերնագիրը փոփոխում եք, կա՛մ նյութը հեռացնում եք, կես ժամ ժամանակ։ Մեր ռուս գործընկերների հետ փայլուն կերպով երկխոսել ենք։ Այսօր մենք խոսում ենք բացառապես մեդիա դաշտում նոր կանոնակարգումների մասին, որոնք միտված են մեր պետության ազգային անվտանգության, լեզվական անվտանգության բարձրացմանը»,-ասաց Մխիթար Հայրապետյանը։

Աղբյուր` Փաստինֆո