Փաստ ինֆո

Դատավոր Ալեքսանդր Ազարյանի նկատմամբ կարգապահական վարույթ հարուցելու օրվա դրությամբ դատական նիստի արձանագրությանը ծանոթ չեն եղել, մինչդեռ՝ դատական նիստի արձանագրությունն է հենց այն հանգամանքը, որի հիմքով վարույթ է հարուցվել։ Այս մասին լրագրողների հետ զրույցում ասաց Վերաքննիչ քրեական դատարանի դատավոր Ալեքսանդր Ազարյանը։

Հարցին, թե արդյո՞ք նա որևէ խնդիր ունի ՀՔԾ պետ Սասուն Խաչատրյանի հետ, Ազարյանը պատասխանեց. «Ես չունեմ, չունեի։ Այս պահի դրությամբ էլ կարծես, թե չունեմ։ Խնդիր ունեմ այն անձանց հետ, ովքեր ինձ ձեռնոց են նետում և ինձ համար խնդիրներ են առաջացնում»,- ասաց նա՝ չնշելով, թե ում նկատի ունի։

Ազարյանն ընդգծեց, որ կողմնակալ չի եղել և անաչառ դիտորդին պետք է հարցնել՝ իր նկատմամբ կասկած առաջացել է, թե ոչ։
Ինչ վերաբերում է արձանագրությանը, Ազարյանն ասաց.«Դուք հասկանու՞մ եք, չէ՞, որ վարույթ հարուցելու համար դատական նիստի արձանագրության ունկնդրումը պարտադիր է։ Փաստերը սխալ են արձանագրված»։

Նա նշեց, որ ինքը մի բան է ասել, ներկայացվել է այլ բան։

Հարցին՝ եթե մեկ այլ դատավոր նման արտահայտություն աներ, ինքը որպես դատական համակարգի ներկայացուցիչ՝ չէ՞ր կասկածի նրա անկողմնակալությանը, դատավորը պատասխանեց, որ սկզբում հարց կբարձրացներ՝ արդյո՞ք այդ դատավորը նման արտահայտություններ անելու հիմքեր ունեցել է ։

Անդրադառնալով Ռոբերտ Քոչարյանի պաշտոնավարման տարիներին նախագահի աշխատակազմի ներկայացուցիչ լինելու հանգամանքի վերաբերյալ հարցին՝ Ազարյանն աաց, որ նման հիմքեր ունենալու դեպքում ինքնաբացարկ կհայտներ։ Բացի այդ՝ դատավոր Ազարյանն ասաց, որ այդ հանգամանքների մասին նա տեղեկացրել է կողմերին, հարց է բարձրացրել՝ արդյո՞ք նշված հանգամանքը կողմերի մոտ կասկած է հարուցում իր կաշկանդվածության վերաբերյալ, նույն քննիչները, դատախազները ինքնաբացարկի հարց չեն բարձրացրել։

Աղբյուր` Փաստինֆո