Փաստ ինֆո

Ալեքսանդր Ազարյանի կողմից թույլ են տրվել ՀՀ դատական օրենսգիրք սահմանադրական օրենքում ամրագրված վարքագծի խախտում։ Ի պաշտոնե գործելիս դրսևորվել է անհարգալից և անբարեկիրթ վերաբերմունք դատավարության մասնակցի և վերջինիս վերադասի նկատմամբ ։ Այս մասին Վերաքննիչ քրեական դատարանի դատավոր Ալեքսանդր Ազարյանին կարգապահական պատասխանատվության ենթարկելու գործով ԲԴԽ նիստին ասաց ՀՀ արդարադատության նախարար Ռուստամ Բադասյանը՝ ներկայացնելով միջնորդությունը։ Ըստ նրա՝ դատավորը պարտավոր է պահպանել սույն օրենսգրքով սահմանված վարքագծի կանոնները, իսկ չպահպանելը կարող է հանգեցնել կարգապահական պատասխանատվության։ Բադասյանը նշեց, որ ի պաշտոնե գործելիս դատավորը պետք է լինի անաչառ և զերծ մնա իր խոսքով և վարքագծով խտրականություն դրսևորելուց կամ ողջամիտ դիտորդի մոտ նման տպավորություն ստեղծելուց։ 

Փաստաբան Տիգրան Աթանեսյանը հետաքրքրվեց, թե դատավորի կոնկրետ որ արտահայտությունն է որպես խախտում դիտարկվել, ինչին ի պատասխան Բադասյանն էլ ասաց, որ միջնորդության մեջ նշված է. «Ըստ ներկայացված հաղորդման՝ նշվում է՝«Ինչն արդյունք է քննչական ծառայության վատ աշխատանքի, այնուհետև՝ դատավորը սկսել է վիրավորական արտահայտություններ անել պաշտոնատար անձանց հասցեին՝ նշելով, որ դատարանը հույս ուներ, որ քննիչը չէր իջնի ՀՔԾ պետի մակարդակին՝ վիճարկելով օրինական ուժի մեջ մտած դատական ակտերը»»։

Բադասյանը նշեց, որ, ուսումնասիրելով ներկայացված հաղորդումը, գտել է, որ առկա է կարգապահական վարույթ հարուցելու առիթը, պաշտոնատար անձի հաղորդումը, բացակայում են կարգապահական վարույթ չհարուցելու հիմքերը։
Փաստաբան Տիգրան Աթանեսյանն էլ, մատնացույց անելով միջնորդությունը, նշեց, որ Բադասյանը որոշման մեջ նախ վկայակոչել է Առաջին ատյանի դատարանի որոշումը, ոստիկանություն ներկայացված հաղորդում և հարուցված քրեական գործը, ներկայացված հաղորդումը, սակայն դրանք կապ չունեն Ալեքսանդր Ազարյանի հետ։

Ռուստամ Բադասյանը կրկնեց նախկինում տրված պատասխանը, թե կարգապահական վարույթ հարուցելու որոշումը բավարար հնարավորություն էր տալիս՝ հասկանալու առերևույթ խախտման հիմքերը և ներկայացնել բացատրություն։

Ավելի վաղ տեղեկացրել ենք, որ Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ է հարուցվել արդարադատության նախարարության կողմից՝ ապրիլին: Մայիսի 22-ին միայն ԲԴԽ-ն հաստատեց, որ ՀՀ արդարադատության նախարարությունից ստացել են միջնորդություն՝ դատավոր Ալեքսանդր Ազարյանին կարգապահական պատասխանատվության ենթարկելու մասին։

Կարգապահական վարույթի հարուցման պատճառը «5-րդ ալիք» ՀԸ սեփականատեր Արմեն Թավադյանի խափանման միջոցի գործով դռնփակ դատական նիստում հնչեցված գնահատականն է:

Արձանագրենք, որ Ալեքսանդր Ազարյանը համարվում է լավագույն դատավորներից մեկը։ Նա երկու տարի շարունակ ճանաչվել է տարվա ամենաբարձր վարկանիշ ունեցող դատավոր, իսկ 2020թ. հունիսի 1-ի դրությամբ՝ նա կրկին ունի ամենաբարձր վարկանիշը՝ 76 միավորով:
Բարձր վարկանիշ ունեցող դատավոր Ալեքսանդր Ազարյանի նկատմամբ աննախադեպ ճնշումներն սկսվել են 2018թ օգոստոսին Ռոբերտ Քոչարյանի խափանման միջոցը վերացնելուց հետո. կայացված դատական ակտով արձանագրվել էր, որ ՀՀ երկրորդ նախագահ Ռոբերտ Քոչարյանն ունի գործառութային անձեռնմխելիություն, ինչը չի հաղթահարվել։ Ճնշումների երկրորդ ալիքը սկսվեց, երբ դատարանը՝ դատավոր Ալեքսանդր Ազարյանի նախագահությամբ, բավարարեց Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը՝ նշելով, որ բացակայում է հիմնավոր կասկածը։

Հեղինակ՝ Իզաբել Սահակյան

Աղբյուր` Փաստինֆո