Փաստ ինֆո

Խորհրդարանում քննարկվում է ԱԺ պատգամավորներ Վահագն Թևոսյանի, Մխիթար Հայրապետյանի և Արման Բաբաջանյանի հեղինակած «Տեսալսողական մեդիայի մասին» և «Լիցենզիայի մասին» օրենքում փոփոխություն կատարելու մասին օրենքների նախագծերի փաթեթը։

Նախագծի համահեղինակ Վահագն Թևոսյանը նշեց, որ 2020 թվականի հուլիսի 20-ին հայտարարվելու են հանրային հեռարձակման ցանցում ազատ թվային տիրույթների մրցույթները, այսինքն` 10 տարվա հաճախականության օգտագործման լիցենզիաներն այս տարվանից ավարտվում են։ Պատգամավորը նշեց, որ անհրաժեշտություն էր առաջանում, որպեսզի այս օրենքն ընդունվի շատ ավելի շուտ, քան կհայտարարվի մրցույթը. «Նախ որպեսզի նրանց համար հասկանալի լինեն այն խաղի կանոնները, որոնք շարադրվելու են այս նախագծում և, որպեսզի նոր մրցույթում հաղթած ու նոր կանոններով գործող մեդիածառայությունները գործեին արդեն նոր օրենքի կարգավորման շրջանում։ Գործող օրենքը բացարձակ այլևս չի կարգավորում հեռուստատեսության և ռադիոյի ոլորտը։Հեռուստատեսային և ռադիոյի հանձնաժողովը միտված է կարգավորելու, վերահսկելու հեռուստատեսության և ռադիոյի ազատությունները, այնինչ մեր գործող իրականությունում կան մի քանի ձևավորված համակարգեր, որոնք այս օրենքով չեն կարգավորվում»,-ասաց պատգամավորը։

Աղբյուր` Փաստինֆո