Փաստ ինֆո

Երևանի ընդհանուր իրավասության դատարանը՝ դատավոր Ռոբերտ Պապոյանի նախագահությամբ հեռացավ խորհրդակցական սենյակ՝ քննարկելու ինքնաբացարկի միջնորդությունը։ Այս մասին լրագրողների հետ զրույցի ժամանակ ասաց ԲՀԿ ղեկավար Գագիկ Ծառուկյանի փաստաբան Երեմ Սարգսյանը։

«Մենք գտնում ենք, որ ընդհանրապես այս մինչդատական վարույթների հետ կապված մակագրությունների կարգը, որոնք տեղի են ունենում ՀՀ-ում, այսինքն դատարանի նախագահն իր ցանկությամբ ընտրում է որևէ դատավորի և մակագրությունն իրականացնում, խախտում է արդար դատաքննության իրավունքը, որովհետև չի ապահովում այն երաշխիքը, որ դատավորի ընտրությունը պատահականության սկզբունքով պետք է լինի։ Չի կարող այնպես լինել, որ դատարանի նախագահը որոշի իր նախընտրած դատավորին»,-ասաց Երեմ Սարգսյանը՝ նշելով, որ բարձրացնում են կոնկրետ Շենգավիթ նստավայրի հետ կապված խնդիրը։ Պաշտպանը կարծում է, որ այս նստավայրում բացառությամբ մեկ-երկու դատավորի, մյուսների մասով խնդիր է լինում. «Կան կոնկրետ դատավորներ, որոնց մասով խնդիրներ կան։ Բազմաթիվ փաստաբաններ արդեն պարբերաբար ահազանգում են, որ օրինակ վարույթն իրականացնող մարմինները ձգտում են իրենց համար խիստ կարևոր գործերով այնպիսի ժամկետներում ներկայացնել կալանավորման միջնորդությունները, երբ Երևան քաղաքում հերթապահությունն իրականացնում է Շենգավիթի նստավայրը։ Այսինքն կարծեք թե կան որոշակի դատավորներ, որ դատարանի նախագահը նախընտրում է մակագրություն անել»,-ասաց փաստաբանը։

Երեմ Սարգսյանն ասաց, որ բուն կալանքի քննությանն այս պահին չեն հասել։

Աղբյուր` Փաստինֆո