Փաստ ինֆո

Դատավոր Ալեքսանդր Ազարյանին կարգապահական պատասխանատվության ենթարկելու գործով ՀՀ արդարադատության նախարարի դիտարկումնհերում և ինձ կարգապահական պատասխանատվության ենթարկելու գործով ԲԴԽ հանձնախմբի պնդումներում առկա է առերևույթ նմանություններ։ Այս մասին ԲԴԽ նիստին ասաց ԲԴԽ անդամ Հայկ Հովհաննիսյանը՝ նշելով, որ իր նկատմամբ հարուցված վարույթը կասեցված է և ուղարկված է ՍԴ։

«Այս պահին չկա վերջնական դիրքորոշում, թե արդյոք ինձ մեղսագրվող խախտումներն իրավաչափ են, թե ոչ։ Այս առումով կողմերի և անկողմնակալ, ողջամիտ և տեղեկացված դիտորդի մոտ կարող է ծագել հարց, թե որքանով է բարոյապես ճիշտ, որ ես դատավոր հանդիսանամ մի գործով, որտեղ կան առերևույթ նմանություններ ԲԴԽ հանձնախմբի կողմից ինձ մեղսագրվող և սույն գործով դատավոր Ազարյանին առաջադրվող ենթադրյալ խախտումների միջև »,- ասաց նա։

Բացի այդ՝ Հովհաննիսյանմը նշեց, որ ՀՔԾ պետն իր համակուրսեցին է, ում հետ գտնվում են մտերիմ հարաբերությունների մեջ։

Նրա խոսքով՝ ունի բավարար հասունություն և կամք՝ վեր կանգնել, թե ընկերական զգացմունքներից, թե մյուս հանգամանքներից, սակայն անկախության և անաչառության տեսանկյունից, ինքնաբացարկ է ներկայացնում։ Դատավոր Ալեքսանդր Ազարյանը հետարքրվեց՝ արդյո՞ք կաշկանդված է, Հովհաննիսյանն էլ պատասխանեց, որ սուբյեկտիվ առումով՝ այո, իսկ օբյեկտիվ առումով՝ կաշկանդված չէ։ Արդարադատության նախարար Ռուստամ Բադասյանն էլ ասաց, որ կարգապահական վարույթի հիմքը կարևոր չէ, սակայն Սասուն Խաչատրյանի հետ ընկերական հարաբերություններ ունենալու հանգամանքը հիմնավոր է։ Փաստաբան Տիգրան Աթանեսյանն էլ ընդգծեց, որ երկրորդ հիմքը հիմնավոր է, քանի որ պատրաստվում են միջնորդել՝ որպես վկա հարցաքննելու ՀՔԾ պետ Սասուն Խաչատրյանին, իսկ ընկերոջը հարցաքննելը հաճելի չէ։ ԲԴԽ-ն մերժեց նաև այս ինքնաբացարկի միջնորդությունը։

Նշենք, որ այսօր քննարկվում է Վերաքննիչ քրեական դատարանի դատավոր Ալեքսանդր Ազարյանին կարգապահական պատասխանատվության ենթարկելու մասին միջնորդությունը։

Ավելի վաղ տեղեկացրել ենք, որ Վերաքննիչ քրեական դատարանի դատավոր Ալեքսանդր Ազարյանի նկատմամբ կարգապահական վարույթ է հարուցվել արդարադատության նախարարության կողմից՝ ապրիլին: Մայիսի 22-ին միայն ԲԴԽ-ն հաստատեց, որ ՀՀ արդարադատության նախարարությունից ստացել են միջնորդություն՝ դատավոր Ալեքսանդր Ազարյանին կարգապահական պատասխանատվության ենթարկելու մասին։

Կարգապահական վարույթի հարուցման պատճառը «5-րդ ալիք» ՀԸ սեփականատեր Արմեն Թավադյանի խափանման միջոցի գործով դռնփակ դատական նիստում հնչեցված գնահատականն է:

Արձանագրենք, որ Ալեքսանդր Ազարյանը համարվում է լավագույն դատավորներից մեկը։ Նա երկու տարի շարունակ ճանաչվել է տարվա ամենաբարձր վարկանիշ ունեցող դատավոր, իսկ 2020թ. հունիսի 1-ի դրությամբ՝ նա կրկին ունի ամենաբարձր վարկանիշը՝ 76 միավորով:
Բարձր վարկանիշ ունեցող դատավոր Ալեքսանդր Ազարյանի նկատմամբ աննախադեպ ճնշումներն սկսվել են 2018թ օգոստոսին Ռոբերտ Քոչարյանի խափանման միջոցը վերացնելուց հետո. կայացված դատական ակտով արձանագրվել էր, որ ՀՀ երկրորդ նախագահ Ռոբերտ Քոչարյանն ունի գործառութային անձեռնմխելիություն, ինչը չի հաղթահարվել։ Ճնշումների երկրորդ ալիքը սկսվեց, երբ դատարանը՝ դատավոր Ալեքսանդր Ազարյանի նախագահությամբ, բավարարեց Արմեն Թավադյանի կալանքի ժամկետը երկարացնելու որոշման դեմ պաշտպանների բողոքը՝ նշելով, որ բացակայում է հիմնավոր կասկածը։

Հեղինակ՝ Իզաբել Սահակյան

Աղբյուր` Փաստինֆո