Փաստ ինֆո

Այսօրվա դրությամբ ունենք 143 մարդ, որը հոսպիտալացման կարիք ունի։ Այս մասին կառավարության նիստի ժամանակ ասաց ՀՀ առողջապահության նախարար Արսեն Թորոսյանը։

«Նրանցից 25-ը գտնվում են տանը, որոնցից 9-ը թեթև ծանրության են, բայց հոսպիտալիզացիայի կարիք ունեն, 16-ը՝ միջին ծանրության են։ Բարեբախտաբար 80 և ավելի ցածր թթվածնի պարունակությամբ քաղաքացիներ, որոնք համարվում են ծանր, չունենք։ Ունենք բազմաթիվ քաղաքացիներ, որոնք գտնվում են այլ բժշկական կենտրոններում, որտեղ նեղ մասնագիտացված կորոնավիրուսային հիվանդության դեմ բուժում չի իրականացվում և կարիք ունեն կորոնավիրուսային հիվանդանոցներ տեղափոխման»,-ասաց Արսեն Թորոսյանը։

Նախարարը նկատեց, որ համաճարակաբանական միտումներով ավելի լավ ենք, քան կանխատեսել էին, ինչը, սակայն, չի նշանակում, որ իրավիճակն ավելի բարվոք է, քան առաջ. «Բացարձակ թվերի հետ գործ ունենք, որոնք բերում են ծանրաբեռնվածության։ Հիմա մենք ունենք 263 ռեանիմացիոն մահճակալ, որոնք տրամադրված են  միայն  կորոնավիրուսին։ Երկու շաբաթ առաջ դրանք 200-ն էին, միևնույն է ազատ տեղեր պրակտիկորեն չկան»,-ասաց նախարարը։

Այս պահի դրությամբ 444 քաղաքացի գտնվում է ծանր վիճակում, 131 քաղաքացի գտնվում է ծայրահեղ ծանր վիճակում, որից 39-ը միացված են թոքերի արհեստական օդափոխության սարքերին։

Աղբյուր` Փաստինֆո