Փաստ ինֆո

Երկար էի մտածում, թե ինչու է վարակված կանանց թիվն ավելի մեծ, քան տղամարդկանց։ Այս մասին կառավարության այսօրվա նիստի ժամանակ ասաց ՀՀ վարչապետ Նիկոլ Փաշինյանը՝ նշելով, որ դրա համար կա երկու պատճառ։ 

«Մեկը, որ տեքստիլի ոլորտից եկողն էր, բայց սուրճախմության հանգամանքը ևս էական դեր է խաղում, որովհետև կանայք այդպիսի ներշենքային շփումներում առավել ակտիվ են լինում և պետք է ուշադրություն հրավիրենք այս խնդրի վրա»,-ասաց վարչապետը։
Այնուհետև Նիկոլ Փաշինյանը Տնտեսական մրցակցության պաշտպանության պետական հանձնաժողովի նախագահ Գեղամ Գևորգյանից հետաքրքրվեց՝ դիմակների շուկայում ինչ վիճակ ունենք։ ՏՄՊՊՀ նախագահն ասաց, որ խոշոր դեղատնային ցանցերում դիմակի գինը 100 դրամ է, իսկ ներմուծվածը մինչև 150 դրամ է հասնում։ Խոսքն ամենաշատ գործածվող եռաշերտ դիմակի մասին է. «Ավտոմատ ապարատների միջոցով այսօր նոր խմբաքանակը երբ ստանանք, մեծածախի գինը դարձել է 60 դրամ։ Ընդ որում տեղական արտադրության երկու ընկերությունն էլ գինն իջեցրել են։ Երբ նոր խմբաքանակը ստանանք, երկու հատը առավելագույնը կդառնա 150 դրամ, այսինքն մեկ դիմակը կծախվի 70-75 դրամի սահմանում»,-ասաց Գեղամ Գևորգյանը։

Նա նշեց, որ այս ամիս կավարտեն բոլոր խոշոր դեղատնային ցանցերի ոլորտում վարույթը, և եթե չարաշահումներ հաստատվեն, ապա պատասխանատվության կենթարկվեն։ Գողամ Գևորգյանն ընդգծեց, որ չկա նման երևույթ, որ ՀՀ-ում առկա է եղել ներմուծված կամ արտադրված 20 դրամանոց դիմակ, որը վաճառվել է 200-220 դրամով. «Այո՛, ժամանակին դիմակները եղել են 20-30 դրամ, բայց ներմուծման արժեքն է ցածր եղել։ Համաշխարհային դեֆիցիտի պատճառով դիմակի գները բարձրացել են»,-ասաց Գեղամ Գևորգյանը։

Աղբյուր` Փաստինֆո