Փաստ ինֆո

Սա իրավական պրոցես է, ես քաղաքական գործիչ չեմ, դա ինձ չի հետաքրքրում, տնտեսական գործունեություն ևս չեմ իրականացրել և դա ևս հետաքրքիր չէ։ Վերաքննիչ քրեական դատարանում Ռոբերտ Քոչարյանի խափանման միջոցի գործով դատական նիստին ասաց նախագահող դատավոր Արսեն Նիկողոսյանը՝ դիմելով տուժողների իրավահաջորդների ներկայացուցիչ Տիգրան Եգորյանին՝ հորդորելով կարծիք հայտնել Ռոբերտ Քոչարյանի վարքագծի տեսանկյունից։ 

Նշենք, որ տուժողների իրավահաջորդի ներկայացուցիչ Տիգրան Եգորյանն իր հայտարարությունում անդրադարձել էր Հյուսիսային պողոտայի շինարարության ընթացքում անձանց ունեզրկմանը, «Արմենթել» ընկերության սեփականաշնորհմանը։ Պաշտպան Հայկ Ալումյանն առարկեց՝ նշելով, որ այդ հայտարարությունները որևէ կապ չունեն գործի հետ, որևէ փաստ ներառված չէ գործի նյութերում։ Եգորյանն էլ ասաց, որ դրանք հանրահայտ փաստեր են։

Նախագահող դատավորի դիտարկումից հետո Եգորյանն, անդրադառնալով անձնական երաշխավորություն ներկայացնող անձանց, ասաց, որ սպառիչ պատասխան չի հնչել, թե արդյո՞ք Ռոբերտ Քոչարյանն իր վարքագիծը կարող է կարգավորել՝ հաշվի առնելով երաշխավորների դիրքորոշումը։ Եգորյանի խոսքով՝ անձնական երաշխավորողների հետ հարաբերություններում աներկբա հեղինակություն է Ռոբերտ Քոչարյանը։ Եգորյանն ընդգծեց, որ իր խնդիրը դատարանին՝ անձնական երաշխավորողների վերաբերյալ գոյություն ունեցող փաստերը ներկայացնելն է։ Անձնական երաշխավորողների մասին Եգորյանի հայտարարությունները լսելուց հետո նախագահող դատավոր Արսեն Նիկողոսյանն ասաց, որ, թեև լսում է պարոն Եգորյանի հայտարարությունը, բայց անհրաժեշտ է փաստեր։

«Մենք իրավաբանների համայնք ենք և ժյուրիի դատարան չունենք, պրոֆեսիոնալ դատավոր է և իրավական փաստերի, փաստական հանգամանքների հիման վրա պետք է գնահատի, այո, ես կարող եմ նշել, որ պարոն Եգորյանը նման հայտարարություն է արել, բայց ես չտեսա դրա հիմքերը և ստիպված չեմ անդրադառնում։ Հիմա արդյո՞ք Ձեր հայտարարությունը կլինի այն ազդեցությունն ունեցողը, որը Դուք ձգտում էիք։ Երևի՝ այդքան չի լինի, այսինքն՝ կդառնա միայն լրագրողների սեփականությունը, իսկ Ձեր նպատակը կարծում եմ ավելի շատ իմ որոշման վրա ազդելն է, քան՝ հասարակության մտածելակերպի, որովհետև ես պրոֆեսիոնալ դատավոր եմ և ինչ էլ մտածի հասարակությունը, եթե ես չեմ կարող իմ որոշումը կայացնել իրավական փաստերի վրա, ուրեմն լավ կլիներ, որ ես դատավոր չլինեի »,- ասաց Նիկողոսյանը։

Եգորյանն էլ պատասխանեց, որ, եթե դատարանն ունի հարցեր, ապա թող ուղիղ ձևով տա դրանք։ Նախագահող դատավորն էլ պ․արզաբանեց, որ րոպեն մեկ չընդհատելը պայմանավորված է, որ չմտնեն բանավեճի և զրույցի մեջ և։ Դատավոր Նիկողոսյանը խնդրեց, որ Եգորյանը ներկայացնի դատարանին փաստերը կամ վկայակոչի այն, որ դատարանն իմանա, թե ինչ է գնահատելու։
«Ինչ որ ներկայացնում եք, ներկայացրեք, որ չունենանք նաև պաշտպանական կողմի արդարացի աաառարկությունները»,- ասաց դատավորը։

Հիշեցնենք, որ պաշտպանական կողմը ներկայացրել էր Ռոբերտ Քոչարյանի խափանման միջոցը փոխելու երեք միջնորդություն՝ անձնական երաշխավորությամբ ազատ արձակելու, կորոնավիրուսով պայմանավորված խափանման միջոցն ընդհանրապես վերացնելու մասին, ինչպես նաև՝ գրավ կիրառելու մասին։ Ռոբերտ Քոչարյանի համար անձնական երաշխավորություն են ներկայացրել Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, Արցախի նախկին վարչապետ Անուշավան Դանիելյանը։ Մայիսի 13-ին Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, մերժեց միջնորդությունները, որի դեմ պաշտպանական կողմը վերաքննիչ բողոք է ներկայացրել։ Մայիսի 22-ին բողոքը մակագրվել էր Վերաքննիչ քրեական դատարանի դատավոր Արմեն Դանիելյանին, ով դատավորների շրջանում ունի ամենացածր՝ -20 վարկանիշը։ Նշենք, որ Արմեն Դանիելյանը այն դատավորն է, որը բեկանել էր Երևանի ընդհանուր իրավասության առաջին ատյանի դատավոր Դավիթ Գրիգորյանի՝ Ռոբերտ Քոչարյանին 2019թ. մայիսի 18-ին ազատ արձակելու և մայիսի 20-ին Ռոբերտ Քոչարյանի և մյուսների գործով գործի վարույթը կասեցնելու և ՍԴ ուղարկելու մասին որոշումները։ Բացի այդ՝ նա նաև բեկանել է Ռոբերտ Քոչարյանի պաշտպանական թիմին «Մարտի 1»-ի մայր գործով գործի նյութերը տրամադրելու մասին Երևանի ընդհանուր իրավասության դատարանի որոշումը։ Արմեն Դանիելյանին բողոքի մակագրումից հետո Ռոբերտ Քոչարյանի պաշտպանները ետ են վերցրել վերաքննիչ բողոքները՝ գտնելով, որ Արմեն Դանիելյանը չի կարող Ռոբերտ Քոչարյանի գործով դատարան լինել։ Հունիսի 1-ին պաշտպան Հովհաննես Խուդոյանը նոր բողոքներ է ներկայացրել վերաքննիչ դատարան։ Հունիսի 8-ին բողոքները մակագրվել են Վերաքննիչ քրեական դատարանի դատավոր Արսեն Նիկողոսյանին։

Հեղինակ՝ Իզաբել Սահակյան

Աղբյուր` Փաստինֆո