Փաստ ինֆո

Քիչ առաջ ստացել ենք ԲՀԿ-ի գրությունը քննիչ հանձնաժողով ձևավորելու հետ կապված։ Այս մասին այսօր լրագրողների հետ զրույցում ասաց «Լուսավոր Հայաստան» խմբակցության ղեկավար Էդմոն Մարուքյանը։

«Քննիչ հանձնաժողովի ստեղծման գաղափարը շրջանառության մեջ է դրվել մեր կողմից դեռ մեկ ամիս առաջ, որից հետո Վանեցյանը խորհրդարանական ուժերին կոչ է արել ստեղծել հանձնաժողով, իսկ այսօր ԲՀ խմբակցությունը նախաձեռնել է քննիչ հանձնաժողովի ձևավորման գործընթացը։ Երբ ասում էի, որ պետք է քննիչ հանձնաժողով լինի, նշել եմ նաև, որ պետք է դիտարկենք նպատակահարմարության հարցը, թե որքանով է նպատակահարմար այս մեծամասնության պայմաններում դա անել։ Ամեն դեպքում քանի որ դրա անհրաժեշտությունը գնալով մեծանում է, նաև ասել ենք, որ միգուցե լավ կլինի մի քիչ էլ սպասել, պանդեմիայի այս բարձր տեմպը նվազի և նոր սկսենք»,-ասաց Էդմոն Մարուքյանը։

Նրա խոսքով, ինչ պանդեմիան սկսվել է, «Լուսավոր Հայաստան» խմբակցությունն իրականացնում է ընթացիկ մոնիթորինգ։ Օրերով և ամիսներով ունեն բոլորի հայտարարությունները, թե ով ինչ է ասել և արել։ Էդմոն Մարուքյանը նշեց, եթե հիմա ձևավորեն հանձնաժողով, այն ձևավորվելու է սեպտեմբեր ամսին. «Մենք քննիչ հանձնաժողովի ստեղծման գաղափարին կաջակցենք պայմանով, որ եթե հանձնաժողովի նախագահ լինի «Լուսավոր Հայաստան»-ի ներկայացուցիչը։ Նախ գաղափարը մերն է և երկրորդը նաև խորհրդարանում կա երեք քննիչ հանձնաժողով, որոնցից մեկը նախագահում է «Իմ քայլ»-ի պատգամավորը, իսկ մյուս երկուսինը ԲՀ խմբակցության ներկայացուցիչները»,-ասաց Էդմոն Մարուքյանը։

Աղբյուր` Փաստինֆո